Kosova është shndërruar në një model frymëzues për shtetet e vogla në zhvillim, falë angazhimit të saj për ndërtimin e paqes, përfshirjes së grave në qeverisje dhe avancimit të drejtësisë sociale.
Kështu vlerësoi Guvernatori i Përgjithshëm i Antigua dhe Barbuda, Rodney Williams, gjatë edicionit të tretë të Forumit Ndërkombëtar për Gratë, Paqen dhe Sigurinë, i cili po mbahet në Prishtinë.
Williams theksoi se përpjekjet e Kosovës për të ndërtuar partneritete strategjike, për të forcuar sundimin e ligjit dhe për të promovuar paqen brenda komunitetit evropian janë shembullore dhe duhet të shërbejnë si inspirim për vende të tjera që kanë kaluar përmes konflikteve.
Në fjalën e tij, ai e ka konsideruar udhëtimin e Kosovës nga lufta në stabilitet si një dëshmi të fuqishme të këmbënguljes dhe vizionit të udhëheqjes së saj, duke nënvizuar se paqja nuk është kurrë rastësore, por një proces që fitohet dhe ruhet përmes përfshirjes dhe guximit.
“Përpjekjet tuaja për sigurimin e partneriteteve strategjike, forcimin e sundimit të ligjit dhe avokimin për paqe të mundshme brenda Bashkësisë Evropiane janë shembullore. Jam veçanërisht i prekur nga avokimi juaj i guximshëm për udhëheqjen e grave në ndërtimin e paqes dhe angazhimi juaj i palëkundur ndaj parimeve të Rezolutës 1325 të Këshillit të Sigurimit të Kombeve të Bashkuara. Qëndrimi juaj në fuqizimin e të rinjve, qeverisjen gjithëpërfshirëse dhe drejtësinë sociale tejkalon kufijtë tuaj dhe pasqyron vlerat e përbashkëta të shteteve të vogla në zhvillim, siç është i yni”.
“Udhëtimi i kombit tuaj nga konflikti në vetëbesim është një dëshmi e fuqisë së këmbënguljes dhe qëllimit. Që takohemi në këtë tokë, dikur e shkatërruar nga lufta dhe sot në përpjekje për paqe, nuk i shpëton askujt prej nesh. Na kujton se paqja nuk është kurrë aksidentale. Ajo fitohet, mbrohet dhe mbahet në jetë përmes vizionit, përfshirjes dhe guximit.
Këtë vit, shënojmë 25-vjetorin e miratimit të Rezolutës 1325 të Këshillit të Sigurimit të Kombeve të Bashkuara — një moment historik në diplomacinë globale. Për herë të parë, Këshilli i Sigurimit njohu jo vetëm barrën e veçantë që mbajnë gratë gjatë konflikteve, por edhe rolin e pazëvendësueshëm të tyre në zgjidhje, rimëkëmbje dhe udhëheqje”, tha ai.
Duke vënë një paralele ndërmjet përvojave të Karaibeve dhe Kosovës, Williams theksoi se gratë kanë qenë gjithmonë shtylla të qëndrueshmërisë në kohë krizash, qoftë përmes avokimit për arsim, udhëheqjes së proceseve të rindërtimit apo ruajtjes së unitetit familjar dhe shoqëror.
Në përmbyllje, ai ka prezantuar katër prioritete si thirrje për veprim global: institucionalizimin e udhëheqjes së grave në siguri, investimin në shëndetin mendor dhe rikuperimin e traumave, përfshirjen aktive të të mbijetuarave në drejtësi dhe kapërcimin e ndarjes digjitale për të mbrojtur të cenueshmit.
“Në Karaibe, ashtu si në Kosovë e më gjerë, kemi parë se si konfliktet, qoftë përmes dhunës, zhvendosjes apo pasigurisë klimatike, mund të çajnë strukturën e shoqërisë. Dhe megjithatë, kemi parë gjithashtu qëndrueshmërinë e grave që e mbajnë atë strukturë të bashkuar, qoftë duke avokuar për arsimim, duke udhëhequr rikuperimin pas fatkeqësive natyrore apo duke mbajtur afër familje të brishta. Gratë e Karaibeve prej kohësh kanë qenë shtylla të forcës dhe shërimit.
Sot, le të kalojmë nga përkujtimi në angazhim. Ofroj katër çelësa si thirrje për veprim: 1. Të institucionalizojmë udhëheqjen e grave në çdo nivel të paqes dhe sigurisë. 2. Të investojmë në shëndetin mendor dhe rikuperimin e traumave në komunitet, veçanërisht për nënat dhe fëmijët. 3.Të amplifikojmë zërin e të mbijetuarve dhe lëvizjeve, jo si zëra simbolikë, por si partnerë qendrorë në formësimin e drejtësisë. 4.Të kapërcejmë ndarjen digjitale, duke u siguruar që teknologjia të jetë një mburojë për të cenueshmit, jo një mjet mbikëqyrjeje”, tha ai.
