Një bastore ilegale është zbuluar nga Policia e Kosovës në një lokal me mbishkrimin AS TAXI, në rrugën Zahir Pajaziti në Podujevë, ku dyshohet se është zhvilluar veprimtari e paligjshme e lojërave të fatit dhe skemave piramidale.
Burimet e Gazetës Sinjali bëjnë me dije se gjatë kontrollit në lokal, i cili menaxhohej nga i dyshuari A. A. 27-vjeçar, njësitë policore kanë gjetur dhe sekuestruar: 51 tiketa lojrash, 911.90 euro para të gatshme, Sistem “elbet-game”, pajisje DVR të kamerave të sigurisë dhe printer termal.
Në lokalin ku është zhvilluar aksioni, përveç pronarit ka qenë edhe një person tjetër, i cili është intervistuar në cilësinë e dëshmitarit.
I dyshuari A.A, gjatë intervistimit në prani të avokatit mbrojtës, ka pranuar se ka ushtruar aktivitet të paligjshëm të bixhozit dhe ka deklaruar se ka përfituar rreth 100 euro në ditë nga kjo veprimtari.
Me urdhër të Prokurorit është iniciuar rasti për veprat penale “Organizim i skemave piramidale” dhe “Bixhoz i paligjshëm”, ndërsa ndaj të dyshuarit është caktuar masa e ndalimit prej 48 orësh.
