Më 2 mars Skender Bajrami – pronar i Auto Sallon “Alberti” ishte arrestuar në kuadër të aksionit ndaj disa biznesmenëve nën dyshimin për fajde, detyrim e shmangie nga tatimi. Mirëpo, sot Gjykata Themelore e Ferizajt nuk e ka aprovuar kërkesën e Prokurisë Themelore të Ferizajt për caktimin e masës së paraburgimit ndaj këtij biznesmeni multimilioner, duke e lënë të lirë të njëjtin.
Pra, nga 15 persona të arrestuar për fajde, detyrim e shmangie nga tatimi, 14 të arrestuarve iu është caktuar masa e paraburgimit, përderisa vetëm Skender Bajrami ka arritur të lirohet. Gazeta online Veriu.info ka arritur të siguroj Aktvendimin e Gjykatës Themelore të Ferizajt të marr sot, ku thuhet se për te pandehurin Skender Bajrami refuzohet kërkesa e Prokurorisë Themelore të Ferizajt.
‘Betimi për Drejtësi’ ka publikuar pjesë nga dosja e prokurorisë, ku shpjegohet se si i pandehuri Skender Bajrami – pronar i Auto Sallonit “Alberti” dyshohet se është përfshirë në tri raste në dhënie të fajdeve.
Aty tregohet se si viktimat detyroheshin të blenin vetura me çmime shumë të larta dhe të njëjtat t’i shisnin menjëherë me çmime shumë të ulëta, me qëllim që me të njëjtat para të marra nga shitja e këtyre veturave të paguanin aty për aty obligimin për fajde.
I dëmtuari detyrohet të blejë veturën 75 mijë euro dhe të njëjtën t’ia shesë për 46 mijë euro të pandehurit për fajde
Ndërsa, në dispozitivin tre të kësaj kërkese të siguruar nga “Betimi për Drejtësi” thuhet se, ekziston dyshimi i bazuar se i pandehuri Skender Bajrami, nga fillimi i vitit 2021 e në vazhdim, në auto sallonin “Alberti”, ka kontraktuar shuma jo proporcionale të pasurisë në këmbim të shërbimit për personin tjetër, duke shfrytëzuar gjendjen e vështirë financiare, në atë mënyrë që i dëmtuari Xhevdet Shala si pronar i ndërmarrjes hoteliere “Golden”, për shkak të vështirësive financiare si pasojë e pandemisë “Covid-19”, si dhe obligimeve nga pagesat e fajdeve për personat tjerë, në pamundësi që të kryej këto obligime, i njëjti është detyruar të blejë nga i pandehuri Bajrami një veturë “BW X6”, e pa doganuar për çmimin prej 67 mijë euro, të cilat para thuhet se i ka marrë në dorë (kesh), e me të cilat para i ka paguar për fajde tek i pandehuri Salih Sinani, duke i shkaktuar dëm të dëmtuarit prej 19 mijë euro.
Tutje, në kërkesën e Prokurorisë thotë se nga rrethanat e cekuar si më lartë, i dëmtuari Xhevdet Shala është detyruar të blejë edhe një veturë “Taureg” për çmimin 75 mijë euro, mirëpo të njëjtën menjëherë ia ka shitur të pandehurit Bajrami për 46 mijë euro, të cilat para i ka marrë në dorë (kesh), e me të cilat para i ka paguar për fajde tek i pandehuri Salih Sinani, duke i shkaktuar dëm të dëmtuarit prej 29 mijë euro.
Me tej, gjithashtu thuhet se në fillim të vitit 2021, në auto sallonin “Alberti”, i pandehuri Bajrami ka kontraktuar shumë jo proporcionale të pasurisë në këmbim të shërbimit për personin tjetër, duke shfrytëzuar gjendjen e vështirë financiare të tij, në atë mënyrë që i dëmtuari Samir Bajrami, pronar i ndërmarrjes tregtare “Ornela”, për shkak të vështirësive financiare, si pasojë e pandemisë “Covid-19”, si dhe obligimeve nga pagesat e fajdeve për personat tjerë, në pamundësi që të paguaj këto obligime, është detyruar ta blejë një veturë “Mercedes GLS2”, me çmim prej 30 mijë euro, të cilin me ndihmën e të pandehurit Salih Sinani e ka shitur në auto sallonin “Alberti” me çmim prej 14 mijë euro, të cilat para janë paguar në dorë, kurse i dëmtuari ka pësuar dëm pasuror në shumë prej 16 mijë eurove.
Me këtë rast, i pandehuri Bajrami dyshohet se ka kryer veprën penale “Fajdeja” nga neni 331 paragrafi 1 lidhur me paragrafin 3 të (KPRK).
Tutje, në kërkesë thuhet se i pandehuri Bajrami, me qëllim që t’i shmangen pjesërisht pagesës së tatimit për të përfituar rimbursimet tatimore, si pronarë i auto sallonit “Alberti”, i pandehuri Bajrami me rastin e shit-blerjes së veturave, pagesën e ka bërë me para kesh, duke shënuar vlera jo të sakta të mallrave të shitura, me ç’rast buxheti i Republikës së Kosovës është dëmtuar në disa mijëra euro.
Për këtë ai ngarkohet të ketë kryer veprën penale “Shmangia nga tatimi”, nga neni 307 paragrafi 1 të KPRK-së.
Dosjen e plotë të Betimi për Drejtësi e gjeni KËTU
Ndryshe, Skender Bajrami është aksionar me 10% (17 milionë euro) në Qendrën Tregtare “Prishtina Mall”, e cila pritet të hapet më 09.03.2023, por që nuk dihet se a do të marrë pjesë në ceremoninë e hapjes.
Më poshtë gjeni artikujt e tjerë për arrestimin e Skender Bajramit:
“Era shtet”! Lirohet Skender Bajrami – pronar i A.S. “Alberti”, i arrestuar për fajde
Veliu: Çuditërisht lajmi për arrestimin e pronarit të “Albertit” u “zhduk” nga mediet
