Alban Krasniqi, bashkëshorti i Albulena Haxhiut që nesër merr detyrën e presidentes, ka sulmuar opozitën, një ditë para se të bëhet Zotëri i Parë.
Krasniqi do të jetë pasardhës i Prindon Sadriut, bashkëshortit të Vjosa Osmanit, i cili nuk ia ka lënë keq me postime kundër të gjithë atyre që kanë kritikuar Osmanin apo edhe vetë Sadriun.
Krasniqi në një postim të shkurtër ka thënë se partitë opozitare e kanë marrë rolin e Agim Pllashnikut, veteranit të UÇK-së, i cili është kritik i madh i pushtetit të Albin Kurtit.
“Sot opozita e paska marr rolin e atij Agim Pllashnikut”, ka shkruar Krasniqi.
Në seancën e sotme, opozita ka qenë aktive, ani pse në sallë ka munguar Vetëvendosje dhe Lista Serbe.
Në një moment, deputetja e PDK-së, Ganimete Musliu ia ka marrë mikrofonin e foltores Albin Kurtit, duke i kërkuar që të dilte në temën për çka ishin mbledhur: çmimin e naftës.
Presidentja Vjosa Osmani të shtunën do t’ia dorëzojë detyrën, kryeparlamentares Albulena Haxhiu, ka bërë të ditur zyra e Presidencës për media në një komunikatë të premten në mbrëmje.
Sipas njoftimit, ceremonia e pranim-dorëzimit të detyrës do të mbahet në kabinetin e Presidencës në orën 16:00.
Kryeparlamentarja Haxhiu do të jetë ushtruese e detyrës së presidentes, pasi Kuvendi ende nuk ka zgjedhur presidentin e ri. Ajo maksimalisht mund ta mbajë këtë post për 6 muaj.
