Nga fushat e 2 Korrikut në skenën e madhe të FC Prishtinës rruga e Lorik Mehmetit premton shumë. Talenti nga Obiliqi ka rrëmbyer vëmendjen e opinionit sportiv me teknikën, shpejtësinë dhe pjekurinë e tij të jashtëzakonshme.
Lorik Mehmeti nuk është më thjesht një emër premtues në akademi. Pasi shkëlqeu me grupmoshat e reja të 2 Korrikut ku u formua si lojtar ai ka bërë hapin e madh në karrierë. FC Prishtina nuk ka humbur kohë dhe ka siguruar shërbimet e tij duke i ofruar kontratën e parë profesionale pasi klubi kryeqytetas e sheh Mehmetin si asetin më të çmuar dhe lojtarin rreth të cilit do të ndërtohet e ardhmja e ekipit.
Për 17-vjeçarin interesimi nuk ka munguar as nga jashtë kufijve ku klube nga Zvicra dhe Çekia kishin shfaqur interesim por kryeqytetasit u treguan më të shpejtë për ta mbajtur “diamantin” në Superligë. Trajneri i mirënjohur Afrim Tovërlani ka dëshmuar sërish nuhatjen e tij për talentët.
Ai i besoi Mehmetit një vend në 11-shen e parë duke i dhënë rolin e protagonistit në sfidat ku presioni dhe pesha e rezultatit ishin maksimale. Edhe pse në moshë shumë të re Loriku tregoi se për të nuk ka barriera duke u shndërruar në një “vetëtimë” në krahët e sulmit duke përdorur teknikën dhe vizionin e tij të jashtëzakonshëm për të krijuar epërsi në fushë.
“Mehmeti luan me qetësinë e një veterani dhe me shpërthimin e një talenti të klasit botëror. Ai është një përforcim i madh për Prishtinën dhe një pasuri për futbollin tonë.”
Në sfidat e fundit veçanërisht në ndeshjet dramatike si ajo e Kupës kundër Ballkanit Mehmeti konfirmoi se është lojtar i momenteve të mëdha. Ai gjeti rrugën drejt rrjetës me një qetësi mahnitëse duke dribluar mbrojtësit kundërshtarë me lehtësi dhe duke treguar saktësi para portës.
Madje pjekuria e tij u vulos edhe në serinë e penalltive ku ekzekutoi me gjakftohtësi duke lënë përshtypjen e një lojtari me përvojë shumëvjeçare. Me përvojën e fituar te grupmoshat U15 dhe U17 të Kombëtares së Kosovës Lorik Mehmeti tani është gati për hapin tjetër të madh.
Sulmuesi anësor nga Obiliqi po shndërrohet me shpejtësi në një nga lojtarët më të përfolur të Superligës dhe nëse vazhdon me këtë ritëm kufijtë e Kosovës shumë shpejt do të jenë të vegjël për talentin e tij.
Ajo që e bën Lorik Mehmetin të dallohet nga bashkëmoshatarët e tij nuk është vetëm talenti i lindur por një kombinim i aftësive të tij në fushë. Ai cilësohet si një rrezik konstant në fazën e kundërsulmit ku shpejtësia e tij shpërthyese i lë mbrojtësit kundërshtarë pa përgjigje.
Kjo dinamikë plotësohet nga një teknikë e hollë dhe aftësi të larta driblimi në hapësira të ngushta duke e bërë atë të paparashikueshëm në duelet një kundër një. Përtej anës fizike Mehmeti tregon një inteligjencë të rrallë në vendosje dhe një vizion loje që kulmon me pasimin e saktë final duke shërbyer si “truri” i sulmit në momentet kyçe.
Megjithatë pika që ka mahnitur më shumë opinionin sportiv është mentaliteti i tij i fortë, 17-vjeçari ruan një gjakftohtësi admiruese para portës dhe nuk tundet as nga presioni i madh i tifozëve duke dëshmuar se është gati për skenat më të larta të futbollit. Prishtina ka fituar një yll, Kosova po rrit një kampion!
