Kryeministri në detyrë i Kosovës, Albin Kurti, në mbledhjen e sotme të Qeverisë, komentoi protestën e bizneseve për bllokimin e hyrjeve në Prishtinë, ai tha se “koha e barrikadave ka kaluar”.
“Për të mbrojtur 1 për qind të ndërmarrjeve më të fuqishme, në kurriz te 99 përqindëshit dhe te familjeve anembanë Kosovës, ata po duan që të bëjnë barrikada në hyrjet e Prishtinës, por koha e barrikadave në Kosovë ka kaluar, i kemi hequr ato kudo ku kanë qenë dhe jemi zotuar që s’do të lejojmë që të vendosen të reja”, tha Kurti.
Për këtë deklaratë në emisionin Rubikon ka folur kryetari i Odës Ekonomike Amerikane, Arianit Zeka. Ai ka pohuar se deklarata e Kurtit është për keqardhje.
“Paga ime vjen nga një pjesë e madhe e këtyre njerëzve që kanë protestuar sot, dhe u heq kapelën dhe ua shprehi mirënjohjen më të madhe të mundshme”.
“Por, a e di se kush është personi i dytë që paguhet nga këta persona? Është kryeministri i Kosovës. Paga ime mund të vijë prej 200 këtyre kompanive që kanë protestuar sot, por paga e kryeministrit vjen nga 1,300 kompani që kanë protestuar sot, dhe të cilat shprehin kundërshtimin e tyre”, ka thënë Zeka.
