Prokuroria Themelore në Prizren ka ngritur aktakuzë ndaj Yll Rraqit, bashkëshortit të Drejtoreshës së Kulturës në Komunën e Suharekës, Albulena Kokollari, nën dyshimin se ka bërë blerje votash në vlerë prej 120 euro ndaj qytetarit me inicialet B.K.
Sipas aktakuzës, më 12.10.2025, në fshatin Budakovë, Komuna e Suharekës, i pandehuri Yll Rraqi ka ofruar shumën prej 120 euro për të pandehurin B.K., me qëllim që ky i fundit të votojë në favor të kandidates për Asamble Komunale, bashkëshortes së tij, Albulena Kokollari, e cila ishte në listën e Aleancës për Ardhmërinë e Kosovës.
Tutje në aktakuzë theksohet se burri i drejtoreshës i ka kërkuar qytetarit t’ia verifikojë përmes telefonit se ia ka dhënë votën gruas së tij, dhe vetëm pas kësaj ia ka dorëzuar shpërblimin.
“…dhe për verifikimin e votimit, i pandehuri Y.Rr. ka kërkuar të shohë telefonin e B.K., pas së cilës i ka dorëzuar shpërblimin…”, thuhet në aktakuzë.
Gazeta Insajderi kishte raportuar më herët për këtë rast. Sipas raportimit, Drejtoresha e Kulturës në Suharekë, Albulena Kokollari, e cila ishte gjithashtu kandidate për Asamble në zgjedhjet e 12 tetorit, po akuzohej për përfshirje në blerje votash. Dyshimet ishin se i përfshirë ishte edhe bashkëshorti i saj, për të cilin pretendohej se ekzistonte një video ku shihej duke paguar deri në 120 euro për një votë.
Këto pretendime janë konfirmuar sot përmes ngritjes së aktakuzës nga Prokuroria Themelore e Prizrenit. Ndërsa nga Drejtoresha e Kulturës, Albulena Kokollari, nuk ka pasur asnjë reagim apo përgjigje, pavarësisht përpjekjeve të mediumit për të marrë një koment nga ajo.
“Prokuroria Themelore në Prizren, Departamenti i Krimeve të Rënda, ka ngritur aktakuzë kundër dy të pandehurve Y.Rr. dhe B.K., për shkak të dyshimit të bazuar se të njëjtit kanë kryer veprën penale ‘Dhënia ose marrja e ryshfetit në lidhje me votimin’ nga neni 212 i Kodit Penal të Republikës së Kosovës (KPRK)”, thuhet në njoftim.
