Policia e Kosovës ka arrestuar pesë persona në Pejë, pasi të njëjtit dyshohen për kryerjen e veprës penale ‘Vrasje’ dhe dhe ‘Shkaktimit të Rrezikut të Përgjithshëm’ ndaj dy viktimave në Pejë.
Pesë personat që u arrestuan nga Policia mbrëmë në lidhje me këtë rast janë: Fatos Çollaku, Roland Beqiri, Demokrat Muçaj, Dardan Ramqaj, dhe Shpend Kelmendi të cilët janë ndaluar për 48 orë.
Të arrestuarit janë hetuar nën dyshimin për veprën penale “Krim i organizuar” dhe për përgatitjen e veprës penale “Vrasje e rëndë”. Të njëjtit dyshohet se kanë bërë marrëveshje, janë organizuar dhe kanë planifikuar kryerjen e një vrasje, si dhe janë përfshirë në krim të organizuar.
Ndërkaq, një muaj më parë ishin arrestuar Qëndrim Elshani, Mentor Dreshaj, Leon Dreshaj dhe Adrian Gashi. Tre të parëve gjykata iu kishte caktuar një muaj paraburgim, kurse i fundit u lirua në procedurë të rregullt.
Të arrestuarit dyshohet se janë pjesë e një grupi kriminal që udhëhiqet nga Demë Elshani, një i arratisur tash e 22 vite nga Kosova.
Sipas njoftimit të policisë, grupi kriminal i cili u shkatërrua pasi u kap në flagrancë duke pranuar armën për kryerjen e një vrasje në Pejë.
Qëndrim Elshani është nipi i Demë Elshanit, i cili po konsiderohet si kreu i grupit kriminal, që kërkohet nga autoritetet kosovare dhe ato ndërkombëtare qysh nga viti 2003 për një serë vrasjesh e tentim-vrasjesh në Pejë.
“Pejë, Prishtinë 2024/2025 , NN- Janë arrestuar katër të dyshuar meshkuj kosovarë, pasi që të njëjtit dyshohet se kanë planifikuar përgatitjen e vrasjes së viktimës. Të dyshuari janë zënë në flagrancë duke pranuar armët për kryerjen e veprës. Gjatë operacionit policor janë kontrolluar vendbanimet e të dyshuarave në katër lokacione të ndryshme ku gjatë kontrollit janë gjetur dhe sekuestruar dy armë, municion të kalibrave të ndryshme si dhe disa dëshmi tjera të rëndësishme. Me vendim të prokurorit pas intervistimit tre të dyshuarit janë dërguar në mbajtje, ndërsa njëri është liruar në procedurë të rregullt”, tha Policia në njoftimin e lëshuar më 30 janar.
Demë Elshani nga Ozdrimi i Pejës, i kërkuar me urdhër-arrest ndërkombëtar për disa vepra të rënda penale, u rikthye në vëmendje pak ditë më parë pasi u përfol për porositjen e një sulmi me granatë dorë ndaj pronës së familjes Dezdari në Pejë.
Akuzat publike për këtë rast bënë që i shumëkërkuari nga autoritetet kosovare dhe ato ndërkombëtare të paraqitet për herë të parë pas 22 vitesh në një deklaratë publike audio të dhënë për gazetën online Reporteri.net.
