Kuvendi Komunal i Prishtinës do të mblidhet nesër, ditë e mërkurë për të votuar Kryesuesin.
Megjithatë, burime të Gazetës Online Reporteri thonë se sonte kryetari i Prishtinës Përparim Rama është duke vazhduar diskutimet për një marrëveshje me Partinë Demokratike të Kosovës.
Votat e asamblistëve të kësaj partie dhe ato të LDK-së do të mundësonin zgjedhjen e kryesuesit, duke mos lejuar dështimin e këtij procesi.
Këto burime kanë thënë se kushtet e PDK-së për Ramën e LDK-në janë hiç më pak se 7 drejtori.
Por ky s’është kushti i vetëm.
“7 drejtori dhe udhëheqja e 5 ndërmarrjeve publike nga kryeshef që vijnë nga PDK-ja, janë kërkesat e kësaj partie për Ramën”, thotë ky burim.
Kërkesë tjetër nga PDK është edhe posti i nënkryetarit, që ishte raportuar edhe më herët por pa u konfirmuar nga kryetari Rama e as ekipi i tij.
Mësohet se sonte mund të ketë një marrëveshje e cila do t’i hapte rrugë votimit të sigurt nesër në asamblenë komunale në Prishtinë.
Por duket se deri më tani ka një hezitim nga kryetari Përparim Rama, i cili ka refuzuar këto kërkesa të Partisë Demokratike të Kosovës.
Në rast se ky refuzim dhe mospajtim vazhdon edhe nesër, pa u arritur një marrëveshje paraprake, atëherë Prishtina rrezikon të shkojë në zgjedhje të jashtëzakonshme për asamble.
Ndryshe, kanë kaluar disa javë që kur kryetari Përparim Rama ka marrë detyrën e kryetarit të Prishtinës, por që ende s’është votuar për kryesuesin e Kuvendit Komunal.
Njëjtë si në Prishtinë, ngecje në këtë proces ka edhe në disa komuna tjera.
