Sébastien Gricourt, këshilltar i zëvendëskryeministrit Besnik Bislimi, ka reaguar pas heqjes së gurit përkujtimor që ishte vendosur në një arë në Korenicë të Gjakovës për ta përkujtuar Pashkë Markaj, nënën që dogji veten pas kthimit dhe varrimit të eshtrave të bijve të saj të vrarë dhe të djegur nga forcat serbe.
Përmes një postimi në llogarinë e tij në Facebook, Gricourt e ka cilësuar veprimin e pronarit të tokës si “akt të pafalshëm”.
Ai ka thënë se pronari veproi lirshëm meqë guri përkujtimor s’pati status zyrtar publik.
“Vertete mik i nderuar heqja e ketij eshte nje turp i pafalshem sepse veteflijimi i Nenes Pashke shkon larg pertej tragjedise se familles se saj. Ajo ishte nje shkemb i familjes sikur ky gur nje shkemb perkujtimor te tragjedise kombetare. Po, ai ishte vendosur buze nje fushe privat, dhe ky shkemb kurre s’pati ndonje status zyrtar publik, dhe per kete arsye pronari veproi lirisht. Por eshte turp per kete njeri dhe meriton nje denim moral sepse duke vepruar ashtu e vrau kujtimin qe i takon gjithe shoqerise, bile jo larg varrezave te Mejes. Veprimi i tij, qofte te motivuara per arsye fetare a politike nuk jane tjeter gje se pasoja e budallalleqes, te paditures dhe te pavetedijes njerezore’, ka shkruar ai.
Se guri përkujtimor është hequr e konfirmuar për Gazetën Express, nipi i saj, pulmologu Flamur Marku. Për arsyet pse pronari i tokës e ka marrë një vendim të tillë, Marku ka thënë se nuk i di, por ka shtuar se në kohën kur guri është vendosur, kjo është bërë me lejen e pronarit.
“E vërtetë qenka që e ka heq, por arsyen se di se në kohën kur është vendosë vetë e ka lejuar”, ka thënë Marku për Express.
Për largimin e këtij guri, fillimisht ka reaguar profesori universitar, Ag Apolloni. Ai ka kërkuar nga Qeveria dhe qytetarët që ta mbrojnë këtë simbol, duke e kthyer gurin aty ku ka qenë.
Sipas Apollonit, ka dyshime se pronari i tokës, Hasan Zenun Bala, e ka marrë këtë vendim për arsye fetare dhe politike.
“Ekzistojnë dyshime se heqja e këtij guri është bërë për arsye fetare (sepse pronari është frikësuar se aty mund të ngritet një kishë, pavarësisht se familja e Pashkës e ka siguruar që nuk do të ngritet asnjë kishë aty), dhe për arsye politike (se s’i paska pëlqy që kryeministri e paska shkelë arën e tij, kur ka bërë homazh te guri. Ai gur nuk është objekt fetar, as nuk është gurthemel kishe, as që ka të bëjë fare me politikë. Çdo kryeministër në të ardhmen duhet të bëjë homazh tek ai gur. Ai gur është simbol i një tragjedie kombëtare. Ai simbolizon vuajtjen e një nëne shqiptare dhe, njëkohësisht, vuajtjen e një populli, pjesë e të cilit është edhe Hasani që bëri një gjest fisnik kur e lejoi vendosjen e gurit në arën e tij, dhe një gjest të pahijshëm kur e hoqi. Hasan, ne shqiptarët (katolikë dhe muslimanë) ishim viktima, dhe lufta nuk u bë për arsye fetare. Ai gur është pjesë e kujtesës sonë kolektive kombëtare. Ktheje gurin në vend të vet!”, ka shkruar Apolloni.
