Lëvizja Vetëvendosje (LVV) dhe Lidhja Demokratike e Kosovës (LDK) kanë arritur marrëveshje që profesori dhe diplomati Bekim Sejdiu të jetë kandidat për President të Republikës së Kosovës.
Marrëveshja u bë publike të hënën, më 31 gusht, nga kryetari i LDK-së, Lumir Abdixhiku, pas takimit me kreun e LVV-së, Albin Kurti.
Abdixhiku deklaroi se pas shqyrtimit të emrave të propozuar, dy subjektet janë dakorduar për një kandidat të përbashkët.
“Nga të gjithë emrat që janë propozuar, jemi dakorduar për një emër – dhe ai është Prof. Dr. Bekim Sejdiu”, tha Abdixhiku.
Sejdiu ndërkohë ka konfirmuar se e ka pranuar propozimin për të kandiduar për postin e presidentit, duke theksuar se vendimi është marrë në një situatë të veçantë politike për Kosovën.
“Kjo mua më bën të ndihem i nderuar, pra besimi që më kanë dhënë të dy partitë politike”, është shprehur ai.
Megjithatë, pavarësisht marrëveshjes mes LVV-së dhe LDK-së, kandidatura e Sejdiut nuk ka kaluar pa kundërshtime, përfshirë edhe brenda vetë LDK-së.
Ish-kryeministri dhe deputeti i LDK-së, Avdullah Hoti, ka bërë të ditur se nuk do ta mbështesë kandidaturën e Sejdiut. Ai ka theksuar se qëndrimi i tij nuk lidhet me arsye personale, por me vlerësimin e tij për rolin që duhet të ketë presidenti.
“Presidenti i Republikës duhet të jetë figurë unifikuese, e cila ndërton konsensus përtej interesave partiake dhe përfaqëson interesin e përgjithshëm të qytetarëve. Në vlerësimin tim, kjo kandidaturë nuk e përmbush këtë kriter”, ka shkruar Hoti.
Në anën tjetër, përveç Abdixhikut, mbështetje publike për Sejdiun kanë shprehur edhe deputetët e LDK-së, Vjosa Osmani dhe Anton Quni.
Deputeti Ermal Sadiku ka deklaruar se e mbështet kandidaturën në parim, por ka nënvizuar se duhet të merret parasysh edhe qëndrimi i strukturave të partisë. Çështja pritet të diskutohet të martën brenda LDK-së.
E paqartë mbetet edhe mënyra se si do të veprojnë PDK-ja dhe AAK-ja gjatë procesit të votimit.
Kryetari i PDK-së, Bedri Hamza, ka deklaruar se LVV-ja dhe LDK-ja, në aspektin matematikor, i kanë numrat për ta tentuar zgjedhjen e Sejdiut. Megjithatë, ai ka lënë të hapur mundësinë që jo të gjithë deputetët e këtyre dy partive të jenë të pranishëm në sallë gjatë votimit.
Hamza ka theksuar se grupi parlamentar i PDK-së është unik dhe se deputetët e saj do t’i qëndrojnë qëndrimit të partisë.
PDK-ja, sipas tij, vazhdon të mos jetë pjesë e marrëveshjeve për krijimin e institucioneve, me përjashtim të çështjes së nënkryetarit të Kuvendit.
Ndërkohë, nga AAK-ja kanë ardhur kritika për mënyrën se si po procedohet me seancën e Kuvendit.
Deputeti Burim Ramadani ka vënë në pikëpyetje vonesën në thirrjen e seancës pas marrëveshjes mes LVV-së dhe LDK-së.
“Pse s’po e thirrin sot seancën e Kuvendit?”, ka shkruar Ramadani.
Ai ka pretenduar se, nëse marrëveshja mes dy partive synon realisht tejkalimin e ngërçit institucional, atëherë Kuvendi duhet të konstituohet menjëherë.
“Mos të ishte lojë me shtetin kjo marrëveshja dypartiake, Kuvendi do të konstituohej menjëherë SOT”, ka deklaruar ai.
Ramadani ka hedhur gjithashtu pretendimin se marrëveshja mes LVV-së dhe LDK-së përfshin edhe ndarjen e posteve, duke shkruar: “Tash marrëveshjen për ndarje të posteve e kanë”.
