Policia e Serbisë ka njoftuar se ka arrestuar të shtunën dy persona nga Kosova, në kufi me Hungarinë, të cilët dyshohen për kontrabandë me emigrantë dhe furnizim me armë.
Qindra oficerë serbë u dërguan të shtunën në një zonë kufitare me Hungarinë, ku ata arrestuan disa persona pasi të shtënat mes emigrantëve rezultuan metre persona të vrarë dhe një tjetër të plagosur, tha policia, raporton Associated Press, transmeton Klankosova.tv.
Raportimet për dhunë dhe përleshje me armë janë bërë të zakonshme pranë kufirit midis Serbisë dhe vendit anëtar të Bashkimit Evropian, Hungarisë. Mijëra emigrantë kanë kampuar në zonë, duke kërkuar mënyra për të kaluar me ndihmën e kontrabandistëve.
Ministri i Brendshëm Bratislav Gasic, i cili vizitoi zonën, u zotua se “ne nuk do të lëvizim nga këtu derisa të largohet çdo person përgjegjës për ndonjë akt apo incident kriminal”.
Veprimet e policisë kanë për qëllim “frenimin e migrimit të parregullt dhe rritjen e nivelit të sigurisë në këtë pjesë të vendit, ku përplasjet mes emigrantëve janë të shpeshta, jo rrallë me përdorimin e armëve të zjarrit”, thuhet në një deklaratë.
Të premten vonë, policia serbe raportoi se ka arrestuar katër shtetas afganë dhe dy turq të dyshuar për posedim të paligjshëm të armëve dhe eksplozivëve. Nuk dihet menjëherë nëse ndonjë nga të arrestuarit do të akuzohet për të shtënat që ndodhën më herët të premten.
Përplasja e dyshuar mes grupeve të emigrantëve ka ndodhur në magazina të braktisura bujqësore pranë fshatit Horgos.
Policia bastisi zonën dhe sekuestroi dy automatikë dhe municione. Ata gjetën gjithashtu 79 emigrantë dhe i transferuan në qendrat e pritjes, thuhet në deklaratë.
