Kryeministri i Republikës së Kosovës, Albin Kurti, ka dhënë detaje për takimin e tij me Ndihmës Sekretarin amerikan të Shtetit, James O’Brien, raporton Gazeta Sinjali.
Kurti ka thënë se biseda me O’Brien ka qenë e përqendruar në atë se si duhet ndihmuar Kosova në aspekte të ndryshme, përfshirë anëtarësimin në NATO.
“Biseda ka qenë e përqendruar në atë se si duhet ndihmuar Kosova, për të avancuar edhe në aspektin e njohjeve ndërkombëtare, të organizmave të ndryshëm ndërkombëtarë, këtu para se gjithash e kam fjalën për partneritetin për paqe, drejt anëtarësimit në NATO, se si kemi nevojë për më shumë siguri për Kosovën e anën tjetër se si përpjekja e Kosovës për integrim evropian dhe euroatlantik është shumë e lidhur me përpjekjen e Shtëpisë së Bardhë, administratës Biden për një udhë të fuqishme tans-atlantike ndërmjet Shteteve të Bashkuara të Amerikës dhe Bashkimit Evropian. James O’Brien më njeh shumë mirë. Më njeh qysh nga shekulli i kaluar, andaj u përqendruam kryesisht në atë se si në muajt në vijim, duhet ecim bashkërisht sa më mirë e sa më shpejt”, ka thënë ai në ATV.
