Më datë 30 maj do të mbahet panairi i Turizmit dhe Karrierës i organizuar nga Universiteti “Haxhi Zeka”, Oda e Hotelerisë dhe Turizmit të Kosovës dhe një organizatë joqeveritare e quajtur Forumi Ekonomik Rajonal Dukagjini.
Sipas organizatorëve ky panair ka për qëllim të promovojë turizmin vendor dhe të ndihmojë studentët dhe të diplomuarit që të njihen më afër me mundësitë e punësimit, punës praktike dhe informim për mundës të fitimit të bursave.
Deri këtu duket gjithçka në rregull.
Por nëse analizohet më detajisht, pjesë e organizimit sipas njoftimit zyrtar është edhe një organizatë jo qeveritare e cekur më lartë, Forumi Ekonomik Rajonal Dukagjini FER-D, e cila si themelues të organizatës ka këta persona: Gentiana Kastrati, Adnan Lataj, Arbërore Haxhija dhe person të autorizuar ka Luan Lulajn, raporton Gazeta Online Veriu.info.
E të gjithë personat e lartcekur po ashtu mbajnë pozita të rëndësishme në menaxhmentin e Universiteti “Haxhi Zeka” në Pejë.
Në adresë të Gazetës është ngritur shqetësimi nga punonjës të këtij universiteti, të cilët pretendojnë se ka konflikt interesi, pasi “Haxhi Zeka” ka marrë si pjesë të organizimit edhe një organizatë e cila drejtohet nga punonjës të rëndësishëm të menaxhmentit të saj.
Veriu.info ka hulumtuar rreth kësaj çështje dhe ka gjetur se kjo organizatë si themelues të saj ka deklaruar: Gentiana Kastratin e cila në universiteti mban pozitë e Drejtores së Zyrës për Sigurim të Cilësisë dhe Vlerësimit, Adnan Lataj që në universitet mban pozitën e Drejtorit të Zyrës së Teknologjisë së Informacionit, Arbërora Haxhijaj që në universitet mban pozitën e Drejtores së Zyrës për Bashkëpunim Ndërkombëtar, kurse si person të autorizuar ka caktuar Luan Lulajn, i cili në universitet mban pozitën e Këshilltarit të Rektorit të Universitetit “Haxhi Zeka”, Armand Krasniqi.
Veriu.info ka tentuar të flas me këshilltarin e Rektorit Luan Lulaj, por i njëjti ka thënë se është i zënë dhe se do të lajmërohet më vonë.
Abedin Selimaj, drejtor i Qendrës për Zhvillim të Karrierës ka thënë se duhet t’i drejtohemi zyrës për komunikim rreth kësaj çështje.
Bazuar në këtë janë ngritur dyshime se ka konflikt interesi pasi kjo organizatë drejtohet nga persona me pozita të larta në universitet.
Sponsor gjeneral të këtij panairi siç shihet në njoftimin zyrtar është Universiteti “Haxhi Zeka” dhe një biznes privat, kurse roli i organizatës FER-D nuk dihet se cili mund të jetë.
