“Na ka blloku oborrin, s’mund të futemi në shtëpi”, akuza ndaj komunës se po ndreq një rrugë për të prishur tjetrën në Stanoc të Poshtëm të Vushtrrisë
Iu gëzuan lajmit që komuna e Vushtrrisë filloi punimet edhe në rrugën e fshatit të tyre, në Stanoc të Poshtëm.
Mirëpo gëzimi i banorëve të rrugës “Sadri Maksuti” nuk zgjati shumë.
Kjo për faktin se sipas banorit Mursel Rama, parregullsi në ndërtimin e trotuarit në këtë rrugë u vërejtën qysh në punimet e para.
65-vjecari i cili ishte një ndër banorët e parë që kishte reaguar, tha se kompania punuese mbylli gypat e kanalizimit dhe pusetat qysh në pikën startuese të trotuarit.
Mbyllja e atyre gypave e pusetave banorëve të kësaj rruge në Stanoc të Poshtëm po ua mbush oborret me ujërat atmosferike..
Për KIKS-in, Rama ka thënë se po iu pamundësohet qëndrimi në oborr, si pasojë e kundërmimit dhe insekteve të shumta.
Rama ka hallin edhe të komshinjve të tij.
Reshjet e shiut po i ngujojnë brenda mureve të shtëpisë banorët përreth tij, meqë oborret e tij po mbushen me ujë dhe ata nuk po kanë se ku të dalin jashtë dyerve të shtëpisë.
65 vjeçari nga Stanoci i Poshtëm akuzon Komunën për moskryerjen e punëve me përpikmëri.
Sipas Ramës, për shkak të pakujdesisë së kompanisë punuese, atij iu mbyll hyrja për në objektin e dyqanit të tij. Si pasojë e kësaj, objekti i lokalit iu përmbyt nga uji duke i shkaktuar dëme dhe në këtë mënyrë ai nuk po mundet që ta kthejë në funksion e ta lëshojë me qira.
Puna që u bë në rrugën “Sadri Maksuti”, sipas Ramës, të asocion me punime të personave amatorë.
Probleme të tilla sipas banorëve, para shtrimit të rrugës e trotuarit nuk patën asnjëherë më parë.
Këto probleme që po e përcjellin çdo familje e cila jeton në lagjen “Sadri Maksuti”, një tjetër banor, Ali Muhaxheri, po mundohet t’i zgjidhë duke e “luftuar” komunën përmes shfrytëzimit të së drejtës për ankesa.
Edhe pse ai u drejtua disa herë në disa drejtori në komunën e Vushtrrisë, përgjigje Muhaxheri thotë se nuk morri as edhe një herë.
Punimet në këtë rrugë, 57 vjeçarit ia mbyllën dyert e oborrit. Muhaxheri ka thënë se u detyrua që me të ardhurat e tij vetanake të bëjë rregullimin e hyrjes për në oborr.
Mirëpo pasojat e mbetura nga kompania kontraktuese e komunës së Vushtrrisë, duket se po del çka t’i rregulloj. Kjo ngase sipas Muhaxherit, edhe pas rregullimit që i bëri, përsëri vazhdon të ketë pengesa e vështirësi.
