Kryetari i Partisë Demokratike të Kosovës, Memli Krasniqi, ka reaguar pas letrës së Gjeneralit Bashkim Jashari lidhur me gjendjen alarmante të shujtave të ushqimit për ushtarët e Forcës së Sigurisë së Kosovës.
Sipas Krasniqit kjo letër nga Gjenerali Jashari shpërfaq gjendjen alarmante në FSK-së, e cila sipas tij duhet të ketë një trajtim emergjent.
I pari i PDK-së ka akuzuar pushtetin aktual për shfrytëzimin e FSK-së vetëm për propagandë dhe fotografi.
“Letra e Gjeneralit Bashkim Jashari dërguar Ministrit të Mbrojtjes lidhur me shqetësimet e shumta që kanë të bëjnë me shërbimet ushqimore, mungesën e personelit dhe problemet sanitare, shpërfaqë një gjendje alaramante në ushtrinë tonë e cila kërkon trajtim emergjent nga ana e shtetit. Fatkeqësisht, ajo që është e thirrur për t’a trajtuar seriozisht këtë çështje, Qeveria, moti ka abstenuar nga obligimet e saj karshi ushtarëve tanë. Kjo Qeveri, për të disatën herë po e dëshmon se ushtrinë e do vetëm për propagandë dhe fotografi – e nuk i intereson aspak mirëqenia dhe shëndeti i vajzave dhe djemve që me përkushtim i shërbejnë ditë dhe natë atdheut”, thuhet mes të tjerash në reagimin e Krasniqit.
Krasniqi është zotuar se partia e tij nuk do të qëndrojë duarkryq dhe se do të kërkojnë llogaridhënie nga qeveria.
“Partia Demokratike e Kosovës nuk do të qëndrojë duarkryq derisa ushtarët tanë po nëpërkëmbën në këtë mënyrë. Në Kuvend dhe në çdo instancë tjetër, do të kërkojmë transparencë dhe llogaridhënie të plotë nga qeveria. Për ushtarët tanë, të cilëve përmes keqmenaxhimit qeveritar po u cënohet morali dhe krenaria, kam vetëm një lutje: mos u dëshpëroni! Angazhimi juaj është boshti i shtetit tonë. Jemi bashkë në këtë sfidë”, thuhet në reagimin e Krasniqit.
