Ministri i Mbrojtjes, Ejup Maqedonci, ka deklaruar se 1000 ushtarë dje kanë ngrënë biftekë të klasës së parë. Ish-gjenerali i UÇK-së, Lahi Brahimaj i ka reaguar ministrit për këtë deklaratë.
Sipas tij ushtarët e FSK-së po detyrohen të mbajnë familjet, duke punuar punë sekondare si pasojë e kushteve të dobëta për punë.
“Ministri Maqedonci dje paska dhënë lajmin se rreth 1000 ushtarë paskan ngrënë biftekë të klasës të parë. Si nuk i vjen turp ministrit ta japë këtë deklaratë publike dy ditë pasi një ushtarak i FSK-së ndërroi jetë duke punuar për idare në një ditë vikendi ngase kushtet që ofron FSK-ja nuk mjaftojnë për të mbajtur familjen. Janë qindra-mijëra ushtarë që detyrohen të punojnë kamerierë, forca të sigurimit privat dhe çfarë pune tjetër fizike sa për të mbijetuar. Dhe për më keq, të njëjtit do i zë dimri me rroba të grisura, të vjetruara dhe pa kushte minimale për temperaturat e ulëta. Kjo ndodh kur një ministër koti krenohet me një racion ushqimi sa për t’i mashtruar militantët që janë në tension nga rënia e besimit të qeverisë në shkuarje”, shkruan Brahimaj në reagim./Indeksonline/
