Kryetari i AAK-së, Ramush Haradinaj ka marrë pjesë në tryezën e organizuar nga dega e partisë në Gjilan me temën “Aleanca për Ujin”, ku ka shpalosur tri zgjidhje konkrete për furnizim me ujë në Gjilan.
Në këtë tryezë, Haradinaj është shprehur se qytetarët e Kosovës meritojnë furnizim të pandërprerë me ujë të pastër.
“Uji është jetë, dhe sot në Gjilan po diskutojmë për të ardhmen e këtij resursi jetik për vendin tonë. Qytetarët e Kosovës meritojnë furnizim të pandërprerë me ujë të pastër – pa njoftime se uji i këtij apo atij liqeni nuk është i pijshem, jo reduktime dhe pasiguri për nevojat bazike”.
“Programi ynë parasheh investime madhore në shtatë diga të reja, nga Manastirica në Prizren deri në Desivojcë të Kamenicës. Për Gjilanin, kemi tre zgjidhje konkrete në studim: pendën në Moravën e Binçës, në Llapushnicë, apo në rrjedhën e Lepencit. Do të zgjedhim alternativën më të mirë, që i shërben qytetarëve për dekada”, ka thënë Haradinaj.
Haradinaj ka shtuar se sistemet e menaxhimit të ujërave atmosferike do të parandalojnë vërshimet dhe siç është shprehur, do të mundësojnë ripërdorimin e ujit për bujqësi dhe industri.
“Nuk mjafton vetëm furnizimi – duhet të mbrojmë edhe cilësinë e ujit. Impiantet e trajtimit të ujërave të ndotura në Prizren, Pejë dhe Gjakovë janë vetëm fillimi. Do të përshpejtojmë projektet në Mitrovicë, Gjilan, Ferizaj dhe Prishtinë, si dhe do të ndërtojmë impiante të reja në komunat më të vogla. Sistemet e menaxhimit të ujërave atmosferike do të parandalojnë vërshimet dhe do të mundësojnë ripërdorimin e ujit për bujqësi dhe industri”.
“Ky vizion për menaxhimin e ujit nuk është thjesht një premtim – është garanci për zhvillim ekonomik, mbrojtje mjedisore dhe cilësi më të mirë jetese për çdo qytetar të Kosovës. Derisa të tjerët flasin, ne veprojmë me plan konkret për të ardhmen e sigurt të resurseve tona ujore”, ka përfunduar Haradinaj.
