Profesori i të Drejtës dhe Marrëdhënieve Ndërkombëtare, Enver Hasani, i është drejtuar edhe një herë Rektorit dhe Senatit për kryetarin e Këshillit të Etikës, Iset Morina. Sipas Hasanit, draftvendimi i Morinës për rekomandimet e këtij Këshilli, është “fund e krye me të meta ligjore”.“Siç mund ju kam njoftuar dje, draft-vendimi i Iset Morinës që ju sot e keni para jush ëhstë fund e krye me të meta ligjore, me shkelje që sigurisht se disa prej tyre përçojnë në procedura hetimore e penale. Mbi të gjitha, nga ai draft qartë shihet se personi që vendos dhe nënshkruan draftin që ju sot e keni para jush është i njëjtë, pra Iset Morina. Kjo çështje është objekt vlerësimi në Agjencinë për Pengimin e Korrupsionit (APK), siç ju njoftova dje.”
Hasani i ka “kërkuar vëmendjen” rektorit dhe senatorëve për “një paligjshmëri tjetër të radhës”.“Në vijim të kësaj, por me qëllim të respektimit të ligjshmërisë nga ana e juaj, në rend të parë nga ana e rektorit Hajrullahu, si titullar i këtij organi, më duhet sërish të kërkoj vëmendjen tuaj për një paligjshmëri tjetër të radhës, e cila sigurisht që ka natyrë të shkeljes esenciale me karakter absolut që afekton të drejtat e mia. Nuk është hiç më e vogël se vendosja në kushtet e konfliktit të interesit që ju njoftova dje.”
Duke cituar rregulloren 857, Hasani ka thënë se “vendimi i Këshillit të Etikës me cilin propozohen masat disiplinore, paraprakisht i prezantohet rektorit dhe më pas procedohet në Senat përkatësisht në Këshill Drejtues më së largu 30 ditë kalendarike pas paraqitjes së shkeljes”.“8.Vendimi i KE bëhet i plotfuqishëm me rastin e miratimit më Senat, përkatësisht në Këshill Drejtues më së voni në afat prej 30 ditë kalendarike pas pranimit të tij. 9.Vendimi i miratuar nga Senati, përkatësisht Këshilli drejtues duhet ti dorëzohet palëve më së voni 5 ditë pune nga dita e miratimit.”
Hasani ka shtuar se data e paraqitjes së “shkeljes së pretenduar” ka qenë 29 gushti i vitit 2024, ndërsa draftvendimi i Këshillit të Etikës është marrë më 13 shtator. Ai thotë se për këtë vendim është njoftuar më 20 shtator.Hasani ka thënë se nga 29 gusht deri sot kur është futur në rend të ditës të Senatit, kanë kaluar 58 ditë.
Sipas tij Senati nuk ka asnjë bazë ligjore që ta trajtojë çështjen e tij jashtë afatit ligjor të përcaktuar me rregullore.“Përtej asaj që e theksova në emalin e djeshëm, lidhur me obligimin tuaj për të pritur një vendim meritor lidhur me kërkesën time në APK për çështjen e interpretimit të konfliktit të interesit të Iset Morina, ju njoftoj se nga data 29 gusht 2024 deri sot 27 nëntor 2024 kur është futur në rend dite të Senatit kanë kaluar 58 ditë, pra Senati nuk ka asnjë bazë ligjore të trajtoj çështjen jashtë afatit ligjor të përcaktuar me rregulloren e sipëcekur.”
Në fund, Hasani ka thënë se çdo veprim në këtë drejtim është kundërligjor dhe arbitrar në tërësinë e vet.Hasani dje i ka kërkuar Rektorit dhe Senatit që të hiqet nga rendi i ditës së Senatit i datës 27 nëntor 2024, votimi për rekomandimin kundër tij, i dhënë nga Iset Morina në emër të Këshillit të Etikës, dhe njëkohësisht të pritet vendimi/opinioni i APK.
Këshilli i Etikës i kishte rekomanduar Senatit që të ulë gradën akademike për profesorin Enver Hasani. Propozimi është që ai të degradohet nga profesor i rregullt në profesor të asocuar. Poashtu pjesë e vendimit të Këshillit të Etikës është edhe ai për revokimin e mirënjohjeve dhe privilegjeve të Hasanit si ish-rektor i UP-së, mohimin e pjesëmarrjes së tij në komisione profesionale për tri vjet si dhe mospërfshirjen në mentorim të të gjitha niveleve për një vit vijues duke filluar nga data e hyrjes në fuqi të këtij vendimi. Gjithashtu, Këshilli i Etikës kishte paraqitur vërejtje me shkrim për Hasanin që të përmbahet nga çfarëdo “gjuhe e papërshtatshme, fyese, pa takt akademik dhe denigrues ndaj personelit dhe punëdhënësit të UP-së”.
