Ministri i Punëve të Brendshme Xhelal Sveçla dhe ai i Pushtetit Lokal, Elbert Krasniqi, kanë publikuar fotografi gjatë një dreke me njërin prej njerëzve që hetohet për korrupsion në Brezovicë.
Sasha Iliq është personi që po hetohet për korrupsion si pjesë e grupit të Branisllav Nikoliqit të Listës Serbe, të cilët akuzohen nga Prokuroria se zhvatën miliona euro mito nga investitorët ilegalë në Brezovicë.
Nga viti 2015 e tutje, Branisllav Nikoliq, njëri nga njerëzit më të fuqishëm të Listës Serbe në Shtërpcë, ishte përfshirë në njërën nga aferat më të mëdha të korrupsionit në Kosovë.
Ish-kryetari i Shtërpcës pretendohet se u dha leje ilegale kompanive dhe ndërtuesve shqiptarë që ndërtonin në këtë zonë ilegalisht.
Ministri i Punëve të Brendshme, Xhelal Sveçla dhe Elbert Krasniqi vendosën ta vizitonin familjen e tij njërin prej njerëzve që hetouet se mori para dhe i dërgoj tek grupi i Nikoliqit të listës Serbe.
Sveqla në postimin e tij të datës 07/01/2025 (akrivi) njoftoj se ka takuar familjen Iliq ndërsa publikoj fotografi në të cilën shihet duke drekuar me të pandehurin Sasha Iliç.
Kallxo.com ka konfirmuar me burime të pavarura se Iliç tavolina e të cilit është nderuar nga ministrat e qeverisë Kurti është personi i njëjtë të cilin po e heton prokurori Rasim Maloku për aferën e Brezovicës.
Prokurori Maloku në një komunikim me ekipin e Kallxo.com ka konfirmuar se personi me emrin Sasha Iliç është person që hetohet për korrupsion në aferën Brezovica. Maloku ka treguar se qështja ndaj Iliç është duke u hetuar dhe hetimet do përfundojnë në mes të vityi 2025.
Iliç ishte arrestuar më 16.03.2022 nën dyshimin për marrje të ryshfetit në lidhje me rastin “Brezovica”.
Sipas dosjes së prokurorisë që kishte siguruar KALLXO.com në atë kohë, Iliç dysohej se nga viti 2010 në Shtërpcë kishte ndihmuar personin zyrtar në kryere të veprës penale të marrjes së ryshfetit.
Ai dyshohej se në cilësinë e zyrtarit në Komunën e Shtërpcës, ka ndërmjetësuar në marrjen e parave në shuma nga 10 mijë euro deri në 30 mijë euro nga personat fizik dhe juridik, për t’iu mundësuar ndërtimin në Parkun Kombëtar “Sharri”, vikend-zona e Brezovicës, në kundërshtim me Ligjin për Ndërtimin, Ligjin për Mbrojtjen e Mjedisit, Ligjin për Ujërat e Kosovës dhe Planin Hapësinor të Parkut Kombëtar “Sharri”, kurse me paratë që i ka marrë si ryshfet , kanë blerë prona të paluajtshme në vikend-zonën, bashkë me të pandehurin ish-Kryetarin e Komunës së Shtërpcës, Bratislav Nikoliq, të cilat janë regjistruar në emër të të pandehurit Sasha, me qëllim që të fshehen nga zbulimi dhe konfiskimi.
Ndaj Iliç, Gjykata e Ferizajt kishte vendosur edhe masën e sigurisë atë të paraburgimit për veprat penale marrje ryshfeti në ndihmë.
KALLXO.com ka kontaktuar me Ministrin e Administrimit dhe Pushtetit Lokal, Elbert Krasniqi në lidhje me drekën me të dyshuarin për korrupsion.
“Jo është e para herë që po dëgjoj nga ana juaj në lidhje me këtë çështje sincerisht nuk mund të them asgjë tjetër. Tash prej juve po e dëgjoj këtë. Asnjë informacion nuk e kemi pasur apo marrë tash po e dëgjoj për herë të parë nga ana juaj. Unë ju thash se për shkak të festës së Krishtlindjeve ortodokse ne kemi qenë në Shtërpce jemi pritë nga dy familje dhe në lidhje me këto pretendimet e juaja unë për herë të parë po dëgjoj tash këtu nga ju në lidhje me këtë çështje”- tha Krasniqi përmes telefonit për KALLXO.com.
E ministri i brendshëm Xhelal Svecla, nuk i është përgjigjur telefonatës dhe kërkesës së KALLXO.com për të sqaruar këtë çështje.
KALLXO.com ka tentuar të marrë përgjigje nga Svecla edhe përmes Shefes së Kabinetit dhe Këshilltares së lartë politike, Jeta Tela por e njëjta nuk ka kthyer ndonjë përgjgije apo koment të ministrit.
Sasha Iliç i arrestuar për korrupsion rasti Brezovica, Ministri Xhelal Svecla, Ministri Elbert Krasniqi, Foto: Facebook
