Autori i debatit Pressing në T7, Leonard Kërquki, në një status në profilin e tij në Facebook ka njoftuar shikuesit e televizionit se “Lëvizja Vetëvendosje ka marrë vendim për t’i “bojkotuar T7, Klan Kosovën dhe TV Dukagjini”. Kërquki vendimin e VV-së e interpretoi si “ikje nga ballafaqimi për qeverisjen katërvjeçare”. Për ketë temë, është duke u diskutuar sonte në Pressing, ku gazetari Baton Haxhiu rrëfeu një “kacafytje” që kishte pasur vite më parë me kryeministrin Albin Kurti.
Haxhiu, atëkohë ishte drejtor i Klan Kosovës dhe autor i emisionit “Zona B”.
“Në vitin 2019 Vetëvendosja dhe kryetari i saj Albin Kurti, e pati lëshuar një deklaratë për bojkotimin e Zonës B (emision i udhëhequr nga Baton Haxhiu në Klan Kosova), dhe Klanit duke personalizuar bojkotin vetëm me emrin tim….”, tha Haxhiu në T7, duke bërë me dije se edhe më parë VV bojkotonte mediat.
Tutje, Haxhiu tha se në një moment i kishte thënë Albin Kurtit që derisa të jetë në krye të Klan Kosovës “ti nuk do të shkelësh kurrë këtu”. Ndaj kësaj deklarate, atëkohë nuk kishte pas reagim Kurti, tha Haxhiu.
“Nuk ka pas një reagim atëherë dhe s’kam dashtë të ketë reagim…Unë brenda zgjedhjeve të vitit 2019 e kam pas një konflikt brenda zyreve të Klan Kosovës, pas një debati me liderin e VV-së, deri në kacafytje. Ai s’ka folë kurgjë, unë kam folë sepse ai i dha një epitet Klan Kosovës që është e afërt me pushtetin, në kohën kur VV-ja e ka pas hapësirën më të madhe. I thash sa të jam unë këtu, ti nuk do të shkelësh këtu kurrë, asnjëherë. Normalisht kryetari i VV-së nuk ka folë atëherë asgjë sepse ka qenë me grupin e tij por ishte një reagim për shkak duke mbrojtë (Kushtrimin gazetarin)”, tha Haxhiu në Pressing, transmeton Express.
