Sot bëhen saktësisht 8 vite që kur Kosova ndaloi hyrjen e trenit serb në Kosovë, i cili ishte i mbështjellë me afishe nacionaliste.
E në krye të kësaj detyre ishte policia e Kosovës, e cila gjithëherë ka qenë në krye të detyrës duke zbatuar ligjin e Republikës së Kosovës.
Gazeta Online Veriu.info sjellë ekskluzivisht fotografinë e ekipit të Policisë që ishte e gatshme ta ndalojë hyrjen e këtij treni serb, që konsiderohej dhuratë nga Rusia.
Këtij ekipi i printe komandanti i Policisë Skender Sadiku, që shihet në pamjet e mëposhtme:
Policia e Kosovës nuk kishte lejuar që të hynte në Kosovë një tren udhëtarësh dhe me zyrtarë të qeverisë së Serbisë që ishte nisur nga Beogradi me destinacion veriun e Kosovës e banuar me shumicë serbe. Autoritetet e Serbisë pa marrë leje nga autoritetet e Kosovës, të shtunën me (14.01.2017) dëshironin ta përuronin, siç thanë, linjën e re të trenit Beograd- Veriu i Kosovës, për herë të parë që nga përfundimi i luftës. Treni serb që thuhet se ishte dhuratë nga qeveria e Rusisë, ishte i mbuluar me ngjyrat e flamurit të Serbisë, në të mbante mbishkrimin në 21 gjuhë të botës ”Kosova është Serbi”, dhe muret brenda trenit ishin të veshura me fotografi dhe ikona mesjetare të manastireve serbe në Kosovë.
Për autoritetet e Prishtinës ky kishte qenë një provokim nga Serbia dhe hyrja e Trenit serb në Kosovë pa leje të autoriteteve përkatëse, siç thanë “cënon sovranitetin e Republikës së Kosovës”.
Institucionet e Kosovës kishin dhënë urdhër që ky tren të ndalohej, dhe kësaj ekipe të Policisë i printe komandanti i Policisë Skender Sadiku.
Në orët e mbëmjes së asaj dite para 8 vitesh, në një konferencë të jashtëzakonshme, kryeministri i Serbisë, Aleksandër Vuqic, kishte thënë se institucionet e Kosovës me trupa të shtuara policore nuk kishin lejuar trenin serb që të hyjë në Kosovë dhe për këtë ai thoshte se e kishte informuar edhe shefen për politikë të jashtme të BE-së, Federika Mogherini.
Në fund treni serb nuk ishte lejuar të hyjë në Kosovë falë profesionalizmit dhe këmbëngulësisë së Policisë së Kosovës.
