Në muajin dhjetor Veriu.info kishte publikuar një intervistë me të akuzuarin për mashtrim të bizneseve të duhanit, Jeton Mehmeti, i cili pretendonte se është viktimë e biznesmenëve Xhevdet Brahimi, Ekrem Lluka dhe Valon Dobroshi.
Ndaj publikimit të intervistës dhe artikullit të shkruar, ankesë në Këshillin e Mediave të Shkruara të Kosovës kishte bërë Ekrem Lluka, me pretendimin se ishin shkelur parimet e gazetarisë, ishte shkelur Kodi i Etikës së gazetarisë, ishte dëmtuar padrejtësisht imazhi i tij, nuk i ishte dhënë e drejta për t’u përgjigjur, etj.
Në përgjigjen e Veriu.info në Këshillin e Mediave të Shkruara të Kosovës ishte sqaruar se portali i është përmbajtur raportimit Kodi të Etikës, pa paragjykuar fajësinë e palëve të përfshira dhe se i është dhënë mundësia Ekrem Llukës që të intervistohet për të dhënë versionin e tij, por që ai akoma nuk ka shprehur interesim për këtë.
Në mbledhjen e mbajtur dje nga Këshilli i Mediave të Shkruara të Kosovës është hedhur poshtë (nuk është miratuar) ankesa e Ekrem Llukës ndaj portalit Veriu.info.
“KMShK nuk e ka miratuar (e ka hedhur poshtë) ankesën e Ekrem Llukës, përfaqësuar nga avokatja Vjosa Shkodra, kundër Veriu.info për shkrimin dhe videon me titull “Akuzohet se mashtroi bizneset e duhanit me rreth 2 milionë euro, Mehmeti: jam viktimë e Xhevdet Bajramit, Ekrem Llukës e Valon Dobroshit”, duke konstatuar se nuk bie ndesh me kapitujt II dhe IV të Kodit të Mediave të Shkruara të Kosovës, siç pretendon ankuesi.”, thuhet në njoftimin e KMShK-së.
Veriu.info fton prapë Ekrem Llukës për intervistim mbi pretendimet e Jeton Mehmetit, duke shprehur gatishmërinë që intervista të realizohet në kohën dhe vendin e përshtatshëm për Ekrem Llukën
Më poshtë gjeni intervistën e realizuar me Jeton Mehmetin, për të cilën kishte bërë ankesë Ekrem Lluka:
