Zgjedhjet e 9 shkurtit duket se nuk i kënaqën asnjë nga partitë e mëdha në Kosovë. E para që doli në listë, sipas rezultateve preliminare me 99.57% të votave të numëruara është Lëvizja Vetëvendosje e Albin Kurtit, e cila mori 40.87%. Por, ky rezultat është i dobët për synimin e madh që pati kjo parti kur i hyri garës për të marrë 500 mijë vota përmes të cilave do të ishte në gjendje të formonte e vetme qeverinë për të udhëhequr edhe katër vjet të tjera. Me këtë rezultat, Vetëvendosjes do t’i duhet të nisë t’i shikojë opsionet meqë nëse do të udhëheqë do t’i duhen me doemos koalicionet.
Për këtë domosdoshmëri ka folur edhe ambasada e Gjermanisë në Kosovë në një prononcim për Gazetën Express kur u pyet për një bllokadë të mundshme të krijimit të institucioneve të reja.
“Derisa jemi ende në pritje të rezultateve përfundimtare, duket se po bëhet gjithnjë e më e qartë se në Kosovë duhet të formohet një qeveri koalicioni”, tha një zëdhënës i ambasadës.
Ai shtoi se Sekretari i Përgjithshëm i NATO-s, Mark Rutte, e kishte me të drejtë kur deklaroi se: “Ne u urojmë të gjithë politikanëve më të mirën në drejtimin e hapësirës politike dhe për të siguruar që një qeveri e qëndrueshme të formohet sa më shpejt që të jetë e mundur”.
Bashkimi Europian dje lëshoi një deklaratë për zgjedhjet në Kosovë, për të cilat tha se sipas konstatimeve preliminare, ato kanë qenë të qeta dhe konkurruese me pjesëmarrjen e të gjitha komuniteteve, ndërsa e potencoi se është zbatuar ligji i ri zgjedhor.
“Fushata ishte e gjallë. Procesi i përgjithshëm tregoi qëndrueshmëri dhe përkushtim ndaj parimeve demokratike”, tha blloku europian.
BE ka vendosur një Mision Vëzhgues Zgjedhor i cili do të qëndrojë në Kosovë për të ndjekur procedurat paszgjedhore si dhe për të nxjerrë rekomandime.
“Ne presim me padurim formimin e Kuvendit dhe Qeverisë së re dhe vazhdimin e angazhimit tonë me autoritetet, me synimin për të mbështetur Kosovën për t’iu afruar BE-së dhe për të përfituar plotësisht nga mundësitë e rëndësishme si Plani i Rritjes për Ballkanin Perëndimor”, thuhet në komunikatën e 11 shkurtit.
BE i bëri thirrje autoriteteve në Kosovë që të angazhohen në bashkëpunim të përgjegjshëm rajonal dhe të intensifikojnë përpjekjet e tyre për të forcuar sundimin e ligjit dhe administratën publike, si dhe për të mbrojtur lirinë e shprehjes.
“Progresi në normalizimin e marrëdhënieve me Serbinë është mënyra e vetme që Kosova të arrijë progres në rrugën e saj europiane. Kosova pritet të zbatojë obligimet e saj që dalin nga Marrëveshja për Rrugën e Normalizimit, si dhe të gjitha marrëveshjet e kaluara të dialogut pa vonesa apo parakushte të mëtejshme. Nuk ka alternativë për dialogun e lehtësuar nga BE”.
