Presidentja e Kosovës, Vjosa Osmani, ka pritur në takimin kryetarin e Komisionit Qendror Zgjedhor, Kreshnik Radoniqin, ku është folur në lidhje me mbarëvajtjen e procesit zgjedhor. Në një njoftim të Presidencës së Kosovës thkesohet se Osmani ka ritheksuar “rëndësinë e angazhimit të plotë për garantimin dhe ruajtjen e integritetit të këtij procesi”.
Në këtë njoftim theksohet se Radoniqi, menjëherë pas problemeve të shfaqura në sistem, I KA SQARUAR Osmanit se “ka ftuar institucionet e sigurisë dhe ato të drejtësisë që të hetojnë problemin dhe se KQZ-ja është në pritje të raportit përfundimtar nga institucionet e sigurisë mbi çështjet e identifikuara që kanë ndikuar në funksionimin e kësaj platforme”.
Në njoftim theksohet se raporti do të ndihmojë në vlerësimin dhe adresimin e çështjeve, duke siguruar transparencë të plotë mbi arsyet e problemeve të faqes së KQZ-së.
“Njëkohësisht, Presidentja Osmani është njoftuar nga z. Radoniqi se KQZ-ja, është duke punuar për të garantuar që çdo votë e dhënë për partitë politike të konfirmohet edhe gjatë procesit të numërimit të votave të kandidatëve. Sipas kreut të KQZ-së, ky proces po realizohet me kujdes të shtuar për të siguruar përputhjen e plotë ndërmjet votave të regjistruara në sistem dhe atyre që ndodhen në kutitë e votimit.
Që nga dita e zgjedhjeve, Presidentja ka qenë në kontakt të vazhdueshëm me Kryetarin Radoniqi si dhe institucionet përkatëse të sigurisë dhe ka kërkuar që të ndërmerren të gjitha masat e nevojshme për të mbrojtur procesin zgjedhor dhe për të garantuar respektimin e plotë të vullnetit të qytetarëve duke rikonfirmuar çdo votë edhe nëpërmjet numërimit manual, përveç atij të bërë në sistemin elektronik.
Në takim, Presidentja Osmani shtroi nevojën e koordinimit të mekanizmave institucional për ruajtjen e integritetit të procesit zgjedhor dhe të vetë votës së qytetarëve” – shkruhet në njoftimin e Presidencës së Kosovës.
