Eugen Cakolli nga Demokracia në Veprim ka thënë se procesi i numërimit në qendra është shpesh kaotik, për shkak të problemeve të vazhdueshme me internetin, tensioneve mes vëzhguesve dhe komisionerëve, mospërputhjeve të shpeshta të të dhënave, stafit të trajnuar dobët, procedurës së pranimit të materialeve.
Sipas Cakollit me këtë ritëm që po numërohen votat do të duhen edhe rreth 3 javë që procesi i numërimit të përmbyllet.
“Me këtë ritëm, edhe sikur 20 qendrat e tjera të fillonin punë nesër—e që nuk pritet të ndodhë—do të duhen rreth 3 javë që ky proces të përmbyllet. Pra, rezultati i plotë për subjektet politike dhe kandidatët e tyre nuk do të dihet para fillimit të marsit.”
Cakolli ka thënë se në disa qendra numërimi nuk ka nisur akoma për shkak të moslidhjes së kamerave me ekrane.
“Për KQZ-në, e vetmja gjë që duket se ka rëndësi është përmbyllja e procesit, pa marrë parasysh vonesat. Shembulli më i qartë i kësaj neglizhence dhe mungese përgjegjësie është arsyetimi zyrtar se në disa qendra numërimi ende nuk ka nisur për shkak të moslidhjes së kamerave me ekranet! Derisa një vend i tërë pret rezultatet, procesi zvarritet për një teknikalitet të tillë absurd.”
Ai ka shtuar që KQZ duhet urgjentisht t’i adresojë këto mangësi.
“KQZ-ja duhet urgjentisht t’i adresojë këto mangësi, të rrisë kapacitetet dhe të garantojë më shumë transparencë. Në anën tjetër, subjektet politike duhet të nxjerrin mësime nga kjo situatë. Ndryshimet sistemore nuk mund të bëhen pa një analizë të thelluar paraprake. Kosova duhet t’i kthehet numërimit të të gjitha votave në vendvotime, në përputhje me standardet dhe praktikat ndërkombëtare.”
