Kryeministri i Kosovës, Albin Kurti derisa erdhi në pushtet, kishte qëndrime të ashpra ndaj simboleve shtetërore të Kosovës, përfshirë flamurin dhe pavarësinë e vendit.
Sa ishte lider i lëvizjes opozitare, Vetëvendosje, Kurti shprehte dyshimin e tij në lidhje me ekzistencën e shtetit të Kosovës dhe kritikonte haptazi me përçmim flamurin që sot është simbol i pavarësisë së vendit.
”Një flamur i cili s’ka kurrfarë të kaluare. Është një flamur që ka ngjyrat e flamurit të Bosnjës. Është një flamur që i përngjan flamurit të Qipros me hartën në mes, e cila funksionon si një lloj kompensimi psikologjik, që qytetarët të mendojnë se njëmend kështu është Kosova, por realiteti në terren është ndryshe”, shprehej Kurti në njërën prej paraqitjeve të tij publike në një televizion shqiptar vetëm pak muaj pasi Kosova shpalli Pavarësinë e saj.
”Veriu dhe pjesët tjera mbesin të ndara”, shtonte ai ndër tjera, komentimin për hartën e Kosovës e cila gjendet e plotë si territori i saj, në flamurin tonë shtetëror.
Tutje ai edhe e ngriste një paralele tjetër, duke e quajtur flamurin e Kosovës si ”të ujit”.
”Dhe për më tepër është një flamur, që është, jo vetëm i ndryshëm por pothuajse i kundërt me flamurin shqiptar – kurse ky është flamur i ujit – e kaltra”.
