“Nuk kemi lajmërim të ri për të bërë sot në lidhje me qëndrimin (ang: posture) e forcave të Shteteve të Bashkuara të Amerikës në Evropë”.
Kështu u përgjigjën fare shkurtazi me shkrim nga Pentagoni pyetur nga gazeta Nacionale për artikullin tronditës të tabloidit gjerman “Bild”.
Në atë artikullin u tha se, sipas burimeve të tyre, ekziston mundësia e tërheqjes së trupave amerikane nga Kosovoa dhe se Italia, si shteti që ka më së shumti trupa të dislokuar në kuadër të KFOR-it, po përgatitet për një skenar të tillë.
Saktësisht këtë pyetje ia drejtuam Departamentit të Mbrojtjes së ShBA-së, të cilët na referuan te një zyrtar në detyrë të Pentagonit.
Përgjigja e tij ishte se “sot” nuk kanë lajmërim të ri për të bërë në lidhje me qëndrimin, në kuptimin vendndodhës (ang: posture), të trupave amerikane në kontinentin evropian – duke mos pohuar e as mohuar përmbajtjen e atij artikulli.
Nacionale: “Për artikulllin e tabloidit ‘Bild’… për trupat amerikane në Kosovë…a mund të mohoni ose konfirmoni raportime te tij?”
Pentagoni: “Nuk kemi lajmërim të ri për të bërë sot në lidhje me vendosjen e forcave të Shteteve të Bashkuara të Amerikës në Evropë”.
Çka thuhej në artikullin e “Bild”?
Gazeta e njohur gjermane të mërkurën raportoi se sipas informatave të saj, Italia është duke u përgatitur për tërheqjen e mundshme të trupave amerikane nga Kosova.
“Sipas të dhënave të Bild-it, Italia është duke u përgatitur për tërheqje të mundshme të trupave të ShBA-së nga Kosova. Aleatët evropianë atëherë do të ishin të vetëm në Ballkan kundër mikut të Putinit, Aleksandar Vuçiq, dhe ushtrisë së tij të fuqishme serbe” – thuhet në artikullin e gazetës gjermane.
“Ka shqetësim të madh në shumë pjesë të Evropës për negociatat amerikano-ruse. Presidenti amerikan, Donald Trump, e ka përjashtuar një tërheqje të plotë të trupave amerikane nga Evropa. Sipas të dhënave të Bild-it, shërbimet perëndimore të sigurisë dhe politikanët perëndimorë kanë frikë se bisedimet që nisën sot në Riad do të mund të çonin në përfundimin e pranisë së trupave amerikane në pjesë të mëdha të Evropës” – thuhet në krye të artikullit.
Një zyrtar i sigurisë në Evropën Lindore gazetës “Bild” i tha: “Sipas të dhënave tona, kjo ka të bëjë me kërkesat e Putinit të vitit 2021, që janë tërheqja e trupave amerikane nga të gjitha shtetet e NATO-s që janë bërë pjesë e aleancës pas vitit 1990.”
Skenari i rastit më të keq është ai në të cilin shumë ekspertë kanë frikë për një pushtim të menjëhershëm nga ushtria ruse në ish-republikat sovjetike, Estoni, Letoni e Lituani, si dhe një luftë e shkallës së lartë me Poloninë, thuhet më tej në artikullin e gazetës gjermane.
Prania e trupave amerikane në zonat afër Rusisë, sipas konsensusit të shteteve fqinje të Rusisë, është garancia më e madhe për pavarësinë e këtyre vendeve.
