Kandidati për deputet nga Partia Demokratike e Kosovës (PDK), Genc Prelvukaj, ka ndarë një mesazh mirënjohjeje dhe reflektimi pas përfundimit të procesit zgjedhor.
Në një status të publikuar në rrjetet sociale, ai ka shprehur falënderimet e tij për mbështetësit, duke vlerësuar eksperiencën e tij si një përvojë të jashtëzakonshme, shkruan Indeksonline.
Prelvukaj ka theksuar se gjatë muajve të fushatës ka pasur mundësinë të takojë njerëz nga të gjitha shtresat e shoqërisë, përfshirë të burgosur politikë, veteranë të luftës, profesorë, bujq, mjekë dhe gazetarë. Ai ka vlerësuar këto takime si një pasuri të madhe shpirtërore dhe njerëzore.
Ai gjithashtu ka bërë të ditur se, sipas vlerësimeve paraprake, ka arritur rreth 12,000 vota, por që nuk kanë qenë të mjaftueshme për ta siguruar një vend në Kuvendin e Kosovës. Megjithatë, ai e ka cilësuar këtë mbështetje si një ndjenjë të bukur dhe një tregues të besimit të madh që i është dhënë.
Prelvukaj ka shtuar se e ka zhvilluar fushatën në një frymë të qetë dhe të argumentuar, duke shmangur metodat jokonvencionale të konkurrencës politike. Ai ka përgëzuar kandidatët fitues të PDK-së dhe është shprehur i bindur se ata do të përfaqësojnë denjësisht partinë dhe qytetarët.
Në fund të mesazhit të tij, ai ka falënderuar ekipin e tij dhe gjithë mbështetësit, duke riafirmuar besimin e tij të palëkundur në Partinë Demokratike të Kosovës, të cilës i ka shërbyer për më shumë se dy dekada.
Postimi i plotë:
Të nderuar Zonja dhe Zotërinj
Për disa muaj me radhë kam punuar në terren për procesin elektoral që është në prag të finalizimit. Në takime të organizuara rresht, kam njohur njerëz nga çdo pjesë e territorit të shtetit, të cilët vështirë se do ti takoja në rrethana tjera.
Kam pasur nderin të njoh të burgosur politikë, veteranë të luftês, shtëpi dëshmorësh, studentë, profesorë, bujq, historianë, mjekë, inzhinierë, gazetarë dhe më shumë. Në këtë kontekst ndjehem shumë më i pasur, sepse këto miqësi nuk lidhen lehtë.
Për secilën ditë të punës, jam munduar që kritikën ta ndërtoj mbi bazën e argumentit, duke evituar gjuhën e papranueshme, sjelljen joetike dhe metodat tjera jokonvencionale të konkurimit politik. Pa e ulur kurrë nivelin, si dhe duke e mbajtur zotimin për qetësi edhe përballë tensioneve që kampanja di ti ketë.
Sidoqoftë, sipas raporteve deri tani mund të kem arritur rreth 12 000 vota, por mësa duket se nuk janë të mjaftueshme për tu bërë pjesë e kuvendit. Mirëpo, përtej votës, janë dymbëdhjetë mijë njerëz që kanë besuar tek une dhe kjo ma jep ndjesinë më të bukur që kam marrë ndonjëherë.
Ndoshta në këtë proces kam mundur të bëj më shumë, më mirë dhe më saktë, por nuk ka relevancë më. Nuk më ka luftuar askush nga brenda, vota nuk më është marrë, nga struktura e partisë kam pasur trajtim korrekt dhe jam i nderuar për këtë.
Për më kuptueshëm: mendoj që elektorati i PDK-së ka pëlqyer më shumë cilësitë intelektuale dhe profesionale të kandidatëve tjerë dhe unë nuk kam korrespoduar me kërkesat e shumicës prej tyre.
Ndërkohë jam i bindur se, në rast triumfi, atë që do ta bëja brenda kuvendit unë, do ta bëjnë edhe më mirë kandidatët që fituan. Gjithsesi fushata qe një eksperiencë e bukur që secilën herë do ta kujtoj me shumë mirësi.
Si konkluzion e falenderoj secilin prej jush që besuat tek unë dhe sidomos ekipin tim, të cilëve u jam mirënjohës çdoherë. Jam mishëruar me ta deri në pikën ku më nuk i shoh ndryshe veçse si antarë të familjës!
Për në fund vazhdoj të besoj në Partinë Demokratike të Kosovës, siç kam bërë për 22 vite rresht, duke provuar ti jap çdo gjë, pa kërkuar asgjë në këmbim.
Me shumë nderim e mirësi
I juaji
Genc Prelvukaj
