“Ku i ke dërgu këta dokumente, cili sistem i drejtësisë do të merret me to? Gjykata Speciale?”, e pati pyetur gazetari Donika Gërvallen kohë më parë.
“Po”, u përgjigj ajo.
Ministrja aktuale e Punëve të Jashtme të Kosovës, kështu kishte treguar në emisionin Info Box në Radio Televizionin Dukagjini, se ka dosje të tëra që i ka mbledhur dhe i ka dërguar në Gjykatën Speciale, e cila akuzon strukturat e Ushtrisë Çlirimtare të Kosovës si “Ndërmarrje e përbashkët kriminale”.
Kjo intervistë e ministres Gërvalla është rikthyer në kujtesë, pas statusit skandaloz për ditën e çlirimit të Kosovës, ku nuk ka përmendur fare Ushtrinë Çlirimtare të Kosovës dhe as dëshmorët e rënë për liri.
“Në ditën e çlirimit të Kosovës kujtojmë edhe të gjithë ushtarët e NATO-s dhe KFOR-it, të cilët kontribuuan fillimisht në çlirimin e Kosovës dhe më pas në paqen dhe stabilitetin e saj”, shkruan Gërvalla, derisa në asnjë fjali të statusit të saj nuk përmend UÇK-në.
Por, siç kishte treguar edhe vetë në emisionin InfoBox ajo është e interesuar ta përmend UÇK-në në një tjetër dimension.
“Unë kam dëshmi madje me shkrim, në zarfe të mbyllura të cilat i janë paraqitur organeve të ndryshme. I kam personalisht në shtëpinë time në Bon”, tregon ajo.
E pyetur sa a i ka dërguar diku, Gërvalla ishte përgjigjur, “unë jam juristë me profesion, i kam dërguar aty ku unë e kam parë të arsyeshme që duheshin dërguar”.
“Në institucionet e Kosovës, apo diku tjetër?”, pyet prapë gazetari.
“Jo, diku tjetër”.
Gërvalla tregon më pas se po flet për Gjykatën Speciale dhe është prokuroria e saj, vendi ku ka dërguar dosje kundër udhëheqësve të UÇK-së.
Sot ministre, ajo vazhdon të refuzojë që ta njoh UÇK-në si forca çliruese e luftës së fundit.
Paradoksale është se i takon një partie që thirrej në vlerat e luftës së të njëjtës ushtri gjatë fushatës elektorale.
Për më tepër, angazhohej për kthimin e dinjitetit të ushtarit të UÇK-se, pasi deklaronin se pasluftës nuk trajtoheshin si duhet çlirimtarët.
