Të dielën , kandidati për kancelar i CDU/CSU, Friedrich Merz u shpall fitues në zgjedhjet parlamentare në Gjermani.
Kandidati favorit për kancelar e përshkroi ndërhyrjen e SHBA-së në fushatën zgjedhore po aq problematike sa edhe ndërhyrjen ruse dhe avokoi që Evropa të bëhet e pavarur nga SHBA-ja sa më shpejt të jetë e mundur.
“Ndërhyrjet nga Uashingtoni nuk ishin më pak dramatike, drastike dhe të paturpshme sesa ato që përjetuam nga Moska”, tha Friedrich Merz në një bisedë mes përfaqësuesve të partisë në televizionin publik pas zgjedhjeve parlamentare.
Ai tha se presidenti amerikan Donald Trump ka treguar se fati i Evropës është krejtësisht i parëndësishëm për amerikanët.
Merz kritikoi veçanërisht mbështetjen e bashkëpunëtorit të Trump, Elon Musk për Alternativën për Gjermaninë (AfD) populiste të krahut të djathtë.
Kancelai i ardhshme i mundshëm tha se Gjermania është nën presion nga shumë anë dhe për këtë arsye bëri thirrje për më shumë unitet në Evropë.
“Nuk e kisha menduar kurrë se do t’i thoja ndonjëherë këto fjalë në televizionin gjerman, por tani prioriteti absolut është arritja e unitetit në Evropë dhe forcimi i Evropës deri në atë pikë sa të mund të bëhet gradualisht e pavarur nga SHBA-ja”, tha kryetari i Unionit Demokristian (CDU).
Ai tha se mezi pret samitin e NATO-s në qershor.
“Çështja është nëse atëherë do të jemi në gjendje të flasim për NATO-n në formën e saj aktuale apo nëse do të na duhet të krijojmë një aftësi evropiane të mbrojtjes edhe më shpejt,” tha Merz.
