Kryeministri Albin Kurti ka kohë deri nesër që të paraqitet në Prokurori.
Deri më tani ai refuzuar kërkesën e Prokurorisë për t’u intervistuar si dëshmitar, derisa i ka bërë thirrje që të shkojnë ta intervistojnë në zyrën e tij.
E, avokati Skënder Musa, në një prononcim për Gazeta Blic, tregon se Kurti mund të dënohet me gjobë prej 250 euro nëse nuk paraqitet në prokurori, teksa tregon se edhe mund të burgoset.
“Neni 132 i Kodit e rregullon çështjen e mos paraqitjes së dëshmitarëve. Kjo dispozitë ligjore parasheh që nëse dëshmitari nuk paraqitet në mënyrë të rregullt dhe mos paraqitja nuk e arsyeton ose pa leje dhe shkak të arsyeshëm largohet nga vendi ku duhet të pyetet, gjyqtari i procedurës paraprake pas ankesës së prokurorit mund ta detyrojë dëshmitarin që të paraqitet. Nëse dëshmitari nuk paraqitet, gjyqtari i procedurës paraprake e dënon së pari me gjobë 250 euro dhe dispozita e parasheh që çdo herë që nuk paraqitet, mirëpo nuk cakton afat. Nëse dëshmitari refuzon të dëshmojë pasi është dënuar, mund të burgoset, afati i paraburgimit që mund të mbahet është një muaj, mund të hiqet kërkesa për dëshminë e tij nëse dëshmia bëhet e parëndësishme për lëndën që hetohet”, thotë ai.
Por, a duhet të intervistohet në zyrën e tij Kurti?
Avokati thotë se kjo s’duhet të ndodhë dhe se intervistimi jashtë Prokurorisë ndodhë në raste të sëmundjeve apo të personave me nevoja të veçanta.
“Absolutisht jo, asnjë qytetar i Kosovës nuk ka të drejtë t’ia caktojë vendin Prokurorisë së ku duhet të dëshmojë. Prokuroria është institucion shtetëror dhe në zyrat e saj jepen dëshmitë, me përjashtim kur kemi të bëjmë me dëshmitarë me nevoja të veçanta, ku marrja e dëshmisë së tyre është tepër e rëndësishme, atëherë kjo rregullohet me nenin 131, ose kur ka të bëjë me ndonjë dëshmitar kur për shkak të ndonjë sëmundje e kanë të pamundur të shkojnë të japin dëshminë, por për njerëzit e shëndetshëm që mund të shkojnë në prokurori, nuk parashihet mundësia që të shkojë prokuroria në vend të ngjarjes, në rast se ka të dyshuar prokuroria autorizon policinë që të shkojnë ta marrin dëshmitarin, e arrestojnë dhe e dërgojnë në stacion”, potencon Musa për Gazeta Blic.
Avokati shton se nuk ka përjashtim të askujt pavarësisht pozitës.
“Por dëshmitarët duhet të shkojnë, pavarësisht pozitës, ministër, kryeministër, me përjashtim të presidentit që ka njëfarë imuniteti por në raste të rënda nuk përjashtohet as ai nga dhënia e dëshmisë”, deklaroi avokati Skënder Musa./Gazeta Blic/
