Gazeta Online Veriu.info raportoi sot ekskluzivisht për arrestimin e një zyrtari policor në veri të vendit, nën dyshimin e veprave penale të kontrabandës me armë dhe municion si pjesë e një aksioni të gjerë të Policisë në regjionin e Mitrovicës, përkatësisht Mitrovicë e Jugut, Mitrovicë e Veriut, Skenderaj dhe Leposaviq.
Lajmin për aksionin në 21 lokacione të ndryshme e ka konfirmuar për Veriu.info Inspektorati Policor i Kosovës, i cili ka njoftuar se janë arrestuar 16 persona.
Ky institucion ka konfirmuar edhe arrestimin e një zyrtari policor për të cilin ka rekomanduar edhe suspendimin e tij.
Veriu.info mëson se zyrtari i arrestuar është T. Radiojevic.
“Në mesin e të arrestuarve që u është caktuar masa e ndalimit është edhe një zyrtar policor (i cili ka qenë me detyrë Stacionin Policor në Mitrovicën e Veriut) I cili dyshohet për veprën penale e paraparë me nenin Neni 364 të Kodit Penale të Republikës së Kosovës “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”. Si pjesë e procedurave të natyrës administrative, IPK ka rekomanduar edhe suspendimin për zyrtarin policor të dyshuar dhe të arrestuar në këtë rast.” – thuhet në përgjigjen e IPK për Veriu.info.
