Avdullah Hoti, Arben Gashi, Shkëmb Manaj, Armend Zemaj, etj., nuk ishin të vetmit anëtarë të kryesisë së LDK-së që ankoheshin e akuzonin për manipulim të votave me postë brenda LDK-së, nga ekipi i angazhuar për Diasporën. Ankesa për procesin, në grupin në “Viber” të partisë, pjesë e të cilit ishte edhe kryetari Lumir Abdixhiku, shprehën edhe Lutfi Haziri, Lirije Kajtazi, Sokol Haliti e Florin Dushi. Gazeta online Reporteri.net sjell serinë e katërt të komunikimeve në grupin e brendshëm të kryesisë së LDK-së.
Përgjigja e kryetarit Lumir Abdixhiku ndaj Avdullah Hotit dhe të tjerëve në kryesisë e LDK-së që në “Viber” u shprehën të pakënaqur rreth procesit me votat me postë, nuk i pëlqeu Lirije Kajtazit, e cila edhe u përmend nga kryetari i partisë në mesazhin e tij, si rast i së kaluarës kur votat e mërgatës ndryshuan renditjen e kandidatëve për deputetë.
“Për zgjedhjet e kaluara ka një vendim gjykate, i bisedojmë ne mbledhje të partisë. E sa për numrat qe do ti rrisë partia, unë jam ithtare e cilësisë e jo sasisë”, reagoi Kajtazi, në mesazhin e saj në “Viber”.
Në fillim të reagimit, Kajtazi i mbështetë pretendimet e akuzat e bashkëpartiakëve tjerë: “Fabrikim tani më i njohur!”, shprehet nder tjera ajo.
“Duhet me pa çka ka ndodhe se kjo s’ka te beje me LDK”, thotë Lutfi Haziri në komunikimin e brendshëm, derisa e ilustron mesazhin e tij me “emoji-n” e dy gishtave, si shenjë simbolizuese e LDK-së.
“Nuk është LDK qe unë e njohe! Por qe është e organizume po shihet ne pike drite”, thotë nder tjera Haziri në mesazhin e tij, përmbajtën e të cilit e ka parë dhe siguruar mediumi.
Pjesë e diskutimit të nxehtë, mes data 2 dhe 3 mars, në grupin në “Viber” të kryesisë së LDK-së u bë edhe Sokol Haliti. Kryetar i Vitisë tha se pa “nga aeroplani” një skemë në procesin e votave me postë.
“Angazhim i madh eshtë ber me kthy mergaten shum mund e kohe e ka 10 vikenda pa e pa familjen, krejt puna parim per shpin ton politike, rezultatet e dhe punen e madhe e si duket te suksesshme dikush e ka prish shihet prej aeroplanit kjo skem, e pakuptushme vertet! Mbetet me analizu bashk, shpia esht e perbashket per tkeq e tmire!”, shkruante Haliti.
E manipuluar me të madhe vota e diasporës brenda LDK-së, i’u duk edhe një anëtari të kryesisë së LDK-së që thotë se ka qenë i përfshirë në çdo proces zgjedhor në Kosovë, prej vitit 1998. Fjala është për Florian Dushin, ish-Drejtorin e Inspeksionit në Kryeqytet, e që pak ditë pas ankesës “Viber” u emërua nënkryetar i Prishtinës, e cila udhëhiqet nga Përparim Rama i LDK-së.
“Çfarë ka ndodhur po duket, fatkeqësisht, është votë në masë të madhe e manipuluar. Pajtohem ta diskutojmë në kryesi dhe të marrim qëndrim për këtë situatë me të cilën LDK po ballafaqohet për herë të parë, s’paku prej zgjedhjeve të marsit ’98 prej kur kam qenë pjesë e te gjitha zgjedhjeve në këtë shtet”.
Kur reagimet në “Viberin” e kryesisë së LDK-së, nuk po ndaleshin, dhe akuzat kishin eskaluar deri në emërtimin e tyre si “skemë e organizuar kriminale”, kryetari Lumir Abdixhiku u lajmërua sërish në grup të nesërmen. Këtë herë me një mesazh drejtuar të gjithë anëtareve të kryesisë, duke ripërsëritur edhe kërkesën e tij që për pretendimet e tyre secili t’i drejtohet edhe organeve kompetete – policisë e prokurorisë.
“Do t’i diskutojme te gjitha faktet e mundshme. Manipulimi i mundeshm i procesit te brendshem – brenda kandidateve – eshte praktike e papranueshme dhe e shemtuar, dhe e dënueshme per mua dhe per LDK-ne. Te gjitha shqetesimet dhe faktet, ju lus t’i mbledhni, e do t’i adresojme se bashke, pa perjashtuar dhe përfshirjen e insituticioneve përkatëse” – thuhet nder tjera në mesazhin e Abdixhikut përmbajtjen e të cilit e ka parë dhe siguruar gazeta online Reporteri.net.
Pak ditë pas këtyre komunikimeve, siç edhe kishte paralajmëruar me mesazhe në grup, kryetari i LDK-së më 10 mars 2025 mblodhi kryesinë e partisë për t’i diskutuar akuzat dhe çështjet e ngritura në “Viber”.
Për serinë e publikimeve të gazetës online Reporteri.net, të mesazheve në “Viber” të anëtareve të kryesisë së LDK-së, mbrëmë ka folur edhe vetë Lutfi Haziri i cili në Kanal 10 shprehej pak i habitur se pse deri më tash nuk i ishte publikuar mesazhi i tij.
“Mes këtyre dy komunikimeve jam unë. Pse nuk më kanë pasqyru mua, a e di? Sepse unë faktoj diçka aty? Unë e di fakt kur ka reagu, edhe unë kur kam reagu, edhe z. Abdixhiku kur ka shkru”. /Reporteri.net/.
