Ish-zëvëndësministrja e Mbrojtjes, Sadika Kofrc nuk e përkrahë idenë e krijimit të komunës boshnjake në Kosovë.
Kofrc-Skënderi ka thënë se krjimi i komunës boshnjake krijon presion dhe tensione të panevojshme në mes të popullatës.
“Bashkësia boshnjake, ashtu si edhe të gjitha komunitetet e tjera pakicë në Kosovë, nuk duhet të synojë krijimin e strukturave të reja komunale të ndara, por të marrë pjesë aktive në rrjedhat shoqërore, politike dhe institucionale brenda komunave ekzistuese, të cilat funksionojnë në kuadër të rendit kushtetues të Republikës së Kosovës.
Kushtetuta e Kosovës garanton të drejtat për të gjitha komunitetet, përfshirë të drejtën për gjuhën, kulturën, arsimin dhe përfaqësimin, dhe pikërisht përmes sistemit ekzistues të vetëqeverisjes lokale këto të drejta mund dhe duhet të realizohen.
Kërkesat për krijimin e komunave të reja mbi baza etnike krijojnë presion të panevojshëm dhe tensione mes popullatës, dëmtojnë marrëdhëniet ndëretnike dhe nxisin krahasime të padëshiruara me kërkesat e komunitetit serb, të cilat tashmë prej kohësh janë burim i bllokadave politike dhe destabilizimit.
Detyra e Qeverisë nuk është të mbështesë fragmentimin e shoqërisë, por të garantojë respektimin e Kushtetutës dhe barazinë e të gjithë qytetarëve në çdo pjesë të territorit të Kosovës. Integrimi, respekti i ndërsjellë dhe pjesëmarrja institucionale janë rruga e vetme drejt ndërtimit të një shoqërie funksionale dhe shumetnike” shkruan në reagim Kofrc.
