Ndonëse kanë kaluar pothuajse tre ditë që kur presidentja Vjosa Osmani publikisht i ka kërkuar kryeministrit të Kosovës, Albin Kurti, që të heq taksën 10 % ndaj SHBA-ve, kjo çështje ende s’ka marrë epilog nga qeveria në detyrë. Të paktën, deri sot s’ka njoftim zyrtar për ndonjë veprim të Kurtit në drejtim të heqjes së taksës ndaj Amerikës, shkruan Gazeta Express.
Përplasja që e pasoi këtë kërkesë publike të Osmanit ndaj Kurtit, dhe sulmi që mori presidentja nga ministri i Financave, Hekuran Murati, zhvendosi vëmendjen nga kërkesa për heqjen e menjëhershme të taksës prej 10 % dhe nga rëndësia e raportit SHBA-Kosovë.
Ministri i Financave, Hekuran Murati, në reagimin e tij ka kritikuar presidenten Osmani për faktin se një kërkesë të tillë e ka bërë publikisht, e që sipas tij tregon jo-seriozitet nga institucioni i Presidencës.
“Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financa”, kishte shkruar ministri Murati më 3 prill 2025.
Ai tha se Qeveria Kurti i ka kërkuar marrëveshje për tregti të lirë SHBA’së por që la të kuptohet se s’ka pasur përgjigje nga pala amerikane. Pastaj, në të njëjtin postim me të cilin i reagoi Osmanit, Murati tha se Qeveria veçse ka qenë duke e shqyrtuar këtë temë dhe kurdo qe merret vendimi do të ketë njoftim me kohë.
Ndaj kritikave të Muratit drejt shefes së shtetit ka qenë i menjëhershëm edhe reagimi i këshilltarit të Osmanit, Bekim Kupina. Ky i fundit i kishte thënë se deklarata e Muratit është e turpshme dhe mungesë e respektit bazik institucional.
“E turpshme, skandaloze, me mungesë të respektit bazik institucional e me mungesë të njohurive bazike se si udhëhiqet shteti e mbi të gjitha me mungesë të gatishmërisë minimale që të punohet e bashkëpunohet në interes të Kosovës është deklarata e tij e sotme. Hiqni tarifat e paarsyeshme ndaj aleatit tonë kryesor, e leni deklaratat e turpshme dhe fëmijërore”, kishte shkruar Kupina.
Por heqja e taksës ndaj SHBA-së po vlerësohet të jetë tepër me rëndësi sa i përket raportit në mes të Kosovës me Administratën e re të Donald Trump.
Ish-kreu i Prishtinës, Shpend Ahmeti, në një reagim të tij në “X” të premten, ka thënë se një veprim i Kosovës që do të largonte taksën, ka rëndësi për presidentin amerikan, Trump, në një kohë kur shumë shtete i janë kthyer kundër pas masave reciproke.
„Heqja e tarifës 10 përqind nga Kosova për prodhimet amerikane nuk ka fare rëndësi ekonomike për ShBA. Mirëpo, në kohën kur krejt reagimet e shteteve janë negative ndaj administratës së Trumpit, një vendim i tillë ka rëndësi politike për Trump. Prandaj është vendim i rëndësishëm“, ka shkruar Shpend Ahmeti.
Se vlerësohet një heqje e mundshme e taksës apo vetëm shprehja e vullnetit për të bërë një gjë të tillë, e ka treguar edhe vetë presidenti amerikan, Donald Trump, i cili i ka bërë publicitet dje kërkesës së një politikani vietnamez, për arritjen e një marrëveshje që Vietnami ta çojë taksën ndaj SHBA-së në zero.
