Çmimet e naftës në nivel global pritet të ulen, pas tarifave të presidentit amerikan, Donald Trump.
Lidhur me këtë, në një prononcim për Gazeta Blic, kryetari i Shoqatës së Naftëtarëve të Kosovës, Fadil Berjani, thotë se në Kosovë aktualisht shkon deri në 1.29 cent, ndërsa që sipas tij çmimi real do të ishte 1 euro.
“Çmimet në tregun kosovar përafërsisht sillen: Diesel 1.18 cent deri 1.29 cent, Benzinë 1.19cent deri 1.28 cent. Ndërkaq çmimet e derivateve në Shqipëri, diseli 1.89 cent dhe benzina 1.88 cent. Ndërkaq në Serbi diseli 1.78. cent dhe benzina 1.79 cent. Për gjendjen ekonomike çfare e kemi në Kosovë, çmimi real kishte me qenë 1 euro. Por kjo nuk varet nga qeveria dhe as nga Shoqata e Naftëtarëve, por varet nga berza dhe organizata prodhuese OPEC”, u shpreh ai.
Po ashtu, Berjani ka folur edhe për vendimin e Ministrisë së Industrisë, Ndërmarrësisë dhe Tregtisë, për rregullimin e çmimeve dhe vendosjen e masave të tjera mbrojtëse, për produktet e naftës të përdorshme në transport.
Sipas tij, vendimi është i gabuar dhe se çmimi i naftës nuk ulet me vendim të qeverisë por me tarifat e Trumpit.
“Vendimi i ministrisë është vendim i gabuar. Kosova me Kushtetutë është treg i lirë, liberal, treg i hapur. Çmimin nuk e ka ulur vendimi i Ministrisë së Tregtisë por tarifat e Trumpit ulin çmimin e naftës në nivel global dhe ka reflektuar edhe te ne në Kosovë”, ka deklaruar Fadil Berjani.
