Analisti Visar Ymeri tha sot se aktualisht ekzistojnë dy opsione për krjimin e Qeverisë së re të Kosovës.
Ish-kryetari i Lëvizjes Vetëvendosje tha sot gjatë një analize se vendi ndodhet larg momentit të arritjes së një koalicioni për formimin e qeverisë së re.
Sipas Ymerit, Kosova është më së afërmi një krize politike, e cila “më pastaj e rrit trysninë te partitë politike” për krijimin e një marrëveshje koalicioni.
“Tash jemi larg atij momenti, mua po më doket jemi më së afërmi një krize politike e cila më pastaj e rrit trysninë te partitë politike që ta bëjnë një marrëveshje koalicioni”, tha Ymeri në një deklarim për Euronews Albania.
Ymeri beson se në situatën aktuale politike ekzistojnë dy skenare të mundshme për krjimin e një qeverie të re.
“Aktualisht janë dy mundësi: Ose e bën qeverinë Vetëvendosje qoftë partner më të vegjël, ose me një partner të madh. Deri tash akterët e Partisë Demokratike kanë qenë refuzues ndaj një koalicioni me LVV-në, por nuk e përjashtoj as këtë plotësisht. Ose e kemi një përbashkim të forcave që deri dje ishin në opozitë. Aktualisht është opsioni i preferuar i PDK-së, AAK-së dhe tre deputetëve të Nismës”, tha Ymeri.
Sipas Ymerit, një opsion tjetër për formimin e qeverisë së re mund të jetë edhe vendimet e mundshme të deputetëve individualë të partive opozitare për të votuar një qeveri të Vetëvendosjes.
Ymeri tha se kjo dinamikë mund të shtohet nëse jepen sinjale për dërgimin e vendit drejt zgjedhjeve të reja.
“Deri tash nuk ka informacion të tillë. Kjo dinamikë mund të shtohet nëse shihet që Kosova po shkon drejt një procesi zgjedhor e jo drejt krjimit të qeverisë, atëherë deputetët individual do ta kenë një interes të shtuar për të votuar një qeveri vetëm e vetëm për të mos lejuar që të shkojmë në zgjedhje”, u shpreh Ymeri.
Ymeri tha se nuk beson që çështja e presidentit të ri pas një viti nuk do të çojë në një krizë të re politike, për shkak të deputetëve individualë, të cilët sipas tij, do të preferojnë që të mos u japin fund mandateve të tyre.
