Afër 600 milionë euro ka importuar rrymë Kosova në katër vjetët e fundit. Në krye të këtij tregtimi qëndron kompania “Noa Energy Trade”, së cilës nuk i dihet adresa as pronari, por që në furnizimin nga importi Kosova më së shumti del se varet prej saj.
As ZRRE dhe as KOSTT nuk kanë komentuar çështjen e importit dhe as për kompanitë prej kah blihet.
Profesionistë që ndjekin zhvillimet në sektorin energjetik procesin e blerjes së rrymës e kanë lidhur me mafinë energjetike.
“Është e frikshme se çfarë ndodh dhe është edhe diçka që njerëzit nuk arrijnë ta kuptojnë sesi vepron mafia energjetike në rajon”, thotë Dajana Berisha nga Forumi për Inicativa Qytetare.
“Këtë termin mafi energjetike e kemi dëgju së pari nga Albin Kurti. Tash po përdori fjalën e tij d.m.th veç ekziston dhe kjo është shumë e qartë se kush përfiton nga importi”, vijon Burim Ejupi nga INDEP.
Për ekonomistin, Safet Gërxhaliu, situata është alarmante.
“Nuk mund të mohohet ekzistimi i mafisë energjetike që e ka kapluar Kosovën, Ballkanin dhe më gjerë. Dihet mirë kjo. Fakti që në Kosovë janë investuar aq shumë mjete për të ndërprerë çdo opsion të prodhimit apo çdo mundësi të shfrytëzimit të kapaciteteve. Ndërlidhja mes mafisë, politikanëve kosovarë dhe ‘patriotëve ambientalë e ka dhënë provimin e vet”, thekson ai.
