Deputeti i zgjedhur i Lidhjes Demokratike të Kosovës, Alban Zogaj, në një intervistë për BlicInterview me Astrit Gashin, ka thënë se nuk mund të flasë për formim të qeverisë nga ta dhe postin e presidentit derisa nuk janë në një situatë të tillë dhe s’mund të bëjë hipoteza.
“Është e vështirë shumë të shkohet në hipoteza të tilla, politikanët po hezitojnë të futen në hipoteza të tilla pasi po japin keqkuptime dhe keqinterpretime, këto janë të parakohshme, sot nuk jemi në atë pozicion që të bisedojmë për një situatë të tillë. I kemi vendosur kushtet por kemi thënë se kur të vijmë te momenti i krijimit të një qeverie do të ulemi në tavolinë dhe të flasim, pasi partia e parë të formojë qeverinë, atëherë do të ulemi dhe t’i diskutojmë të gjitha opsionet. Kritikat i kemi vlerësuar si të padrejta ndaj LDK-së, pasi LDK nuk është partia e vetme në këtë konstalacion politik dhe ne e kemi vendin tonë në Kuvend të Kosovës”, ka thënë ai.
Zogaj ka shtuar se nuk kanë votë për VV-në, duke theksuar se Albulena Haxhiu është figurë përçarëse dhe se duhet një propozim tjetër që do të mund ta shqyrtonin.
“Ajo që ne insistojmë është që i pari le të vazhdojë me krijim të institucioneve. Vazhdoni tutje, krijoni shumicën dhe pastaj shohim e bëjmë. Ne kemi votë kundër, këtë të drejtë na e jep ligji, Kushtetuta dhe shpesh po e themi me çfarë të drejte na e kërkojnë votën, sidomos jo blanco, sidomos për ndonjë figurë që është treguar figurë përçarëse. Kuvendit i duhet figurë bashkuese. Fillimisht kemi thënë që s’kemi votë për VV-në, por në ndonjë rast tjetër do të mund ta shqyrtonim, por me këtë kandidaturë as nuk mund ta shqyrtojmë. Ata e kanë të drejtën e propozimit dhe ne të drejtën e votimit. Është një figurë përçarëse, që s’ka treguar asnjë element të përbashkimit. Kryetari i Kuvendit është figurë përbashkuese. Disa po e bëjnë kryetarin e Kuvendit si një figurë që vetëm udhëheq mbledhjet por jo, ne vlerësojmë që ai është një figurë shumë e rëndësishme. Më herët janë votuar kryetarët e Kuvendit sepse ka pasur marrëveshje politike, ka pasur shumicë, ndërsa sot nuk ka. Ne jemi në këtë gjendje pasi LVV nuk po arrin që të ketë shumicë dhe po tregohet e paaftë dhe rigjide për të krijuar shumicën”, ka vlerësuar Zogaj.
Por, Zogaj thekson se nuk kanë diskutuar në parti se kë do të mund ta votonin.
“Nuk e kemi diskutuar një gjë të tillë. Duhet parë propozimet. Sa i përket Konjufcës, nga një prizëm tjetër dhe nga një këndvështrim personal e kam parë një sjellje korrekte në shumicën e rasteve. Kam qenë befasuar pse Glauku nuk është propozim”, ka potencuar deputeti.
