Komisioni Qendror i Zgjedhjeve ka publikuar raportet e paaudituara të deklarimit financiar të fushatës zgjedhore të subjekteve politike për zgjedhjet parlamentare që u mbajtën në shkurt të këtij viti.
Sipas raportit të publikuar, Lëvizja Vetëvendosje ka shpenzuar më së shumti para gjatë fushatës, gjithsej 1 milionë e 702 mijë euro.
Të hyra gjatë kësaj periudhe ndërkaq, ka pasur 1 milionë e 112 mijë euro.
Ku i shpenzoi VV paratë?
Sipas raportit, Lëvizja Vetëvendosje shpenzoi rreth 36 mijë euro në paga dhe kompenzime.
Afër 200 mijë euro, partia e parë i shpenzoi në transport, duke përfshirë këtu edhe bileta të aeroplanit, autobusit, trenit, taksit e të tjera.
Mbi 1 milionë e 180 mijë euro, Vetëvendosje i ka shpenzuar në reklama e konferenca, si dhe rreth 42 mijë në blerje të mallrave.
Vetëvendosje ka deklaruar se I shpenzoi mbi 230 mijë euro në shpenzime të përgjithshme si qeraja e lokalit të zyrës, telefonë, internet dhe postë, gjoba e ndëshkime, shpenzime lidhur me donacionet e të tjera.
Të gjitha detajet mund t’i lexoni në dokumentin më poshtë.
Në anën tjetër, VV ka deklaruar se ka paguar mbi 200 mijë euro gjoba e ndëshkime në Panelin zgjedhor për Ankesa dhe Parashtresa.
VV ia ka dhënë mbi 17 mijë euro edhe kompanisë së njohur që bën sondazhe, UBO Consulting.
Në kohë fushate, duke tentuar të tërheq votuesit e rinj, Vetëvendosje kishte organizuar edhe një ndenjë në një prej diskotekave të njohura në Prishtinë.
Ushqimi dhe pijet aty partisë në pushtet i kanë kushtuar mbi 10 mijë euro.
Për më shumë detaje, klikoni në këtë LINK.
Theksojmë se publikimi i raporteve të deklarimit financiare bëhet sipas Ligjit nr.08/L-122 për Financim të Subjekteve Politike.
“Sipas këtij ligji, është detyrim ligjor për subjektet politike që garojnë në zgjedhje të dorëzojnë në Zyrën për Regjistrim, Certifikim dhe Kontrollin Financiar të Subjekteve Politike (ZRCKFSP) raportin financiar të fushatës zgjedhore jo më vonë se 30 ditë kalendarike pas certifikimit të rezultateve përfundimtare nga KQZ” – thuhet në njoftimin e KQZ-së.
KQZ ka theksuar se ende nuk është bërë auditimi i raporteve, dhe se të njëjtat mund të pësojnë ndryshime.
“Duke pasur parasysh se ende nuk është bërë auditimi i këtyre raporteve, sqarojmë se këto raporte financiare janë të paaudituara dhe mund të pësojnë ndryshime dhe saktësime gjatë procesit të auditimit.
Raportet e deklarimit financiar të fushatës zgjedhore të Zgjedhjeve për Kuvendin e Kosovës që u mbajtën më 9 shkurt 2025, ashtu si raportet vjetore financiare të subjekteve politike për vitin 2024 që janë publikuar në muajin mars, do t’i nënshtrohen procesit të auditimit” – thuhet në njoftim.
