“Jam i interesuar dhe i vullnetshëm për marrëveshje politike me LDK-në”, i shkroi kreu i Vetëvendosjes, Albin Kurti të hënën kreut të LDK-së, Lumir Abdixhiku, në një letër të dytë drejtuar Lidhjes Demokratike të Kosovës me thirrjen për koalicion.
As i interesuar e as i vullnetshëm s’doli të jetë Abdixhiku dhe LDK për bashkëpunim me Kurtin dhe Lëvizjen Vetëvendosje.
Pas një mbledhje në parti që patën sot në LDK, Abdixhiku tha se partia e tij e ka vlerësuar “të pamundur bashkëpunimin me Kurtin”.
“LDK-ja, për mungesë besimi dhe duke pasur parasysh stagnimin 4-vjeçar të vendit nën udhëheqjen tuaj, rrezikimin e aleancave strategjike, të sigurisë nacionale, rrezikimin serioz të demokracisë dhe të lirisë së shprehjes, atakimin e institucioneve të pavarura kushtetuese, mosrespektimin e vendimeve të këtyre institucioneve, mbi të gjitha polarizimin e thellë shoqëror, e ka vlerësuar të pamundur bashkëpunimin me ju”, thuhet në letrën e kthyer të Abdixhikut për Kurtin.
Abdixhiku në letër tha se atë e ktheu “i nxitur nga konsiderata për votuesit tuaj, qytetarë të Republikës së Kosovës, ndjej nevojën që, edhe nëpërmjet kësaj letre, t’i përsëris qëndrimet dhe bindjet tona mbi çështjet që keni ngritur ju”.
Në letër, LDK akuzon Vetëvendosjen për bllokadën politike në vend dhe që “në mënyrë arbitrare” po e pamundëson krijimin e legjislaturës së re.
“Sot, vendi ndodhet në një krizë të thellë politike dhe institucionale për shkak të dështimit tuaj që të krijoni partneritete politike që do të garantonin shumicën. Po ashtu, nëpërmjet bllokimit të procesit të zgjedhjes së kryetarit të Kuvendit, ju, në mënyrë arbitrare, po pamundësoni konstituimin e legjislaturës së re”, thuhet në letër.
Për daljen nga cikli bllokues në Kuvend, Abdixhiku shpalosi pak më herët për media një propozim – një qeveri nacionale të tranzicionit me të gjitha partitë shqiptare deri në zgjedhjen e presidentit të ri.
Këtë ia përmendi edhe Kurtit në letër, ndërsa tha se takim me të realizon për këtë nismë dhe bashkë me liderët e partive të tjera politike shqiptare.
“LDK dhe unë si kryetari i saj, propozojmë nisjen e një procesi të ri politik dhe kjo zgjidhje kërkon edhe përgjegjshmëri edhe unitet, por mbi të gjitha kërkon dhe vetëdije të lartë politike nacionale. LDK propozon nisjen e këtij procesi, fillimisht konsultativ me të gjitha partitë politike shqiptare me qëllim formimin e qeverisë nacionale të tranzicionit. LDK kërkon unitet gjithëshqiptar në këtë periudhë dhe formimin e qeverisë nacionale të tranzicionet, një qeveri me afat të caktuar deri në zgjedhjen e presidentit të ri”, tha Abdixhiku sot për media e ngjashëm ia tha edhe Kurtit në letër.
“Për këtë si kryetar i LDK-së jam i gatshëm të takohem me të gjitha partitë politike shqiptare, të ndihmoj në këtë proces dhe e ftoj edhe zotëri Kurtin siç i ftoj edhe liderët politikë, të cilët i kam njoftuar tashmë për këtë iniciativë kurdo që ata e shohin të arsyeshme”, shtoi ai.
Ai tha se qeveria e tranzicionit do të kishte një kryeministër “unifikues”.
“Po flasim për qeveri nacionale të tranzicionit, të unitetit të tanishëm, të domosdoshëm për Kosovën dhe me afat të shkurtër. Me kryeministër dhe kabinet unifikues deri në zgjedhjen e presidentit të Kosovës”, tha ai.
Përveç Kurtit, Abdixhiku tha se i ka njoftuar të gjithë liderët e partive politike shqiptare për këtë ide dhe se tashmë ka marrë një përgjigje pozitive nga kryetari i Aleancës për Ardhmërinë e Kosovës, Ramush Haradinaj.
Në konferencë, Abdixhiku Kurtin e la fajtor edhe për polarizim.
“I shërben edhe shërimit të polarizimit për të cilin është fajtor z.Kurti personalisht, por edhe i jep një orientim të mbarë për Republikën e Kosovës”, tha ai.
Për rreshtin që Kurti i shkroi Abdixhikut se është “i bindur” që votuesit e LDK-së e preferojnë “më së shumti” koalicionin me Vetëvendosjen, Abdixhiku tha se çka duan votuesit e LDK-së flet ai vetë si kryetar i LDK-së.
