Mbledhja e katërt e Kuvendit të Komunës së Prishtinës u ndërpre sot për shkak të mungesës së kuorumit, pasi kryetari Përparim Rama, bashkë me këshilltarët komunalë të LDK-së, braktisën sallën në shenjë pakënaqësie me rendin e ditës.
Mbledhja nisi në orën 10:20 dhe kishte në agjendë 18 pika, përfshirë raportin e punës së “Termokos”, subvencionimin e KRM “Pastrimi”, dhe diskutime për situatën me qentë endacakë. Por debati u ndez rreth pikës 14, propozim-vendimi për hartimin e planit të hollësishëm rregullues në Çagllavicë.
Kryetari Rama kërkoi që kjo pikë të kalojë në fillim të rendit të ditës, por kërkesa e tij nuk u miratua. Pas kësaj, ai dhe përfaqësuesit e LDK-së u larguan nga mbledhja.
Shefja e asamblistëve të LDK-së, Jeta Rafuna, tha se “ajo pikë është dashur të vendoset në fillim, siç ka kërkuar, sipas saj, kryetari Rama”.
Por reagimi më i ashpër erdhi nga PDK. Këshilltari Leutrim Retkoceri akuzoi hapur Ramën për interesa të dyshimta.
“Përparim Rama nuk mundet me vendosë vet renditjen e temave të cilat do të diskutohen në kuvend. Rama s’mund të kushtëzojë kalimin e propozimeve tjera me këtë pikë. Kryetari ka halle tjera. Ai e ka mendjen 70 hektarë në Çagllavicë. Ka ngut ta ngjisë sa më lart në rend dite – sepse aty janë interesat e tij. Aty janë premtimet që u ka dhënë biznesmenëve për koeficientë ndërtimi. Ka borxhe për të larë – jo ndaj qytetarëve, por ndaj atyre që i financuan ‘rrugëtimin ndërtimor’.”
Përplasjet e ashpra dhe bojkoti nga LDK bënë që mbledhja të ndërpritet pa u shqyrtuar as gjysma e temave të planifikuara.
