Në kohën kur Shqipëria do të presë liderët evropianë në kuadër të Samitit Politik Evropian, opozita paralajmëron një protestë të madhe në kryeqytet. Më 16 maj, në orën 17:00, në Bulevardin “Dëshmorët e Kombit” në Tiranë, Partia Demokratike do të organizojë një tubim paqësor me qëllim sensibilizimin e opinionit ndërkombëtar për, siç pretendon kryetari i kësaj partie, Sali Berisha, “manipulimin masiv të zgjedhjeve” nga qeveria shqiptare.
Berisha akuzon kryeministrin Edi Rama për një sërë shkeljesh dhe manipulimesh që, sipas tij, kanë ndodhur në votimet e fundit, me theks të veçantë në procesin e votimit të diasporës.
Në një deklaratë për mediat, ai u ndal në rezultatet e votimeve nga Greqia, të cilat i cilësoi si të manipuluara dhe të orkestruara pas vizitës së ministrit Taulant Balla atje. Ai e krahasoi këtë situatë me praktikat e një regjimi autoritar.
“Ky krim është po kaq monstruoz në diasporë. Ju e morët vesh besoj, se si në kutinë e Beratit për diasporën dilte PS 99.6 përqind. Pra, kemi të bëjmë me Korenë e Veriut. Kjo është e vërteta. Në qoftë se nga Greqia, ardhja me postë të zakonshme çdo ditë para se famëziu, krimineli Balla të shkonte me hordhinë e patronazhistëve në Greqi, ishte 1000-1300 zarfe, pas dërgimit të kriminel Ballës në Greqi, kanë ardhur 6 mijë zarfe, të gjitha të manipuluara.”
Ai kërkoi që çdo parregullsi të dokumentohet nga komisionerët, duke theksuar se opozita respekton çdo votë të dhënë në kushte që ai i quan “terrori”.
“Ju besoj se po e ndiqni numërimin e votave në diasporë se si ato janë me shenjat më të sigurta të falsitetit dhe manipulimit. Thirrja ime është kjo për të gjithë komisionerët që po bëjnë punë me vetëmohim, të numërojnë çdo votë në dëshmi të respektit tonë të palëkundur ndaj atyre që në kushte terrori kanë votuar për opozitën. Të regjistrojnë dhe të mbajnë shënim çdo parregullsi.”
Berisha tha se protesta nuk do të synojë prishjen e rendit publik apo cenimin e sigurisë së liderëve ndërkombëtarë që do të jenë në Samit, por do të shërbejë për të përcjellë mesazhin e opozitës.
“Libri i zi i këtyre zgjedhjeve shkruhet me datën 16 në ora 17:00 në Bulevardin e Parë për të sensibilizuar opinionin publik botëror mbi krimet monstruoze të përbindëshit elektoral Edi Rama, që nuk respekton asnjë rregull, asnjë ligj kombëtar dhe ndërkombëtar për zgjedhjet. Protesta do të jetë paqësore.
Ne garantojmë se nuk do ketë probleme që të cenojnë në shkallën më të vogël sigurinë e dinjitarëve që vijnë, por duam që ata të mësojnë se kanë qenë të ftuar nga një narkodiktator që nuk njeh ligj as moral për votën dhe vullnetin e qytetarëve të tij”, tha Berisha.
