Veriu.info sot ka raportuar ekskluzivisht se si Agjencia e Ushqimit dhe Veterinarisë, institucion që funksionon në kuadër të Ministrisë së Bujqësisë, Pylltarisë dhe Zhvillit Rural, më ministër në detyrë, Faton Peci, ka mbajtur të fshehur për më shumë se nj (1) vit emrin e kompanisë të cilës iu gjeten 21 tonë mish peshku të infektuar me krimba, që del të jetë “MC FOOD” Sh.P.K., kompani kjo e njohur në vitin 2021 për skandalin e trafikimit të 400 kg kokainë nga Brazili në Kosovë.
Në pjesën e dytë të këtij hulumtim, Veriu.info ju sjellë emrat e dy kompanive “DELFIN” L.T.D. Sh.P.K. dhe “Mediteran – N” Sh.P.K., të cilave në vitin e kaluar iu zbuluan mbi 66 tonë mish peshku të infektuar me parazitin “Anisakis”, krimb ky shumë i rrezikshëm për shëndetin e njërzve. Agjencia e Ushqimit dhe Veterinarisë nuk e kishte informuar opinionin me rastin e zbulimit të kësaj sasie marramendëse të mishit të peshkut të infektuar me krimba, e aq më pak me emrat e kompanive që e kanë importuar këtë produkt ushqimor të ndjeshëm.
Në dokumentet e siguruara nga Veriu.info, shihet se AUV vitin e kaluar kishte gjetur mbi 35 mijë kilogram mish peshku të infektuar me krimba, sasi që ishte importuar nga Spanja dhe Maqedonia e veriut në Kosovë në fund të vitit 2023 nga kompania “DELFIN” L.T.D. Sh.P.K. me pronar Basri dhe Avni Krasniqi.
Në arsyetimin e AUV për vendimin e nxjerrë ndaj “DELFIN” L.T.D. Sh.P.K. thuhet se mostrat e marra nga Inspektorati Veterinar në kompaninë e lartëcekur, rezultuan me prezencë të parazitit krimba – “Anisakis”, ku për pasojë “DELFIN” L.T.D. Sh.P.K. është urdhëruar për ndalimin e tregtimit të këtij produkti.
Mishi i peshkut i kompanisë “DELFIN” L.T.D. Sh.P.K. që është konstatuar e infektuar me krimba është e llojit Hake (Merluc Hubbsi), përderisa sasia e tij është 35,170 kilogram.
Një javë pas inspektimit dhe vendimit për ndalimin e tregtimit të kësaj sasie peshku, AUV merr një vendim të ri me të cilin e urdhëron kompaninë “DELFIN” L.T.D. Sh.P.K. për kthimin e këtij produkti ushqimor në vendin e origjinës ose të bëjë kërkesë për asgjësimin e tij.
Veriu.info ka siguruar edhe një vendim tjetër të AUV, me të cilin dëshmohet se ky agjencion vitin e kaluar kishte zbuluar edhe 31,296 kg mish peshku te infektuar me krimba, përkatësisht me parazitin “Anisakis” të importuar në Kosovë nga Maqedonia veriore prej kompanisë “Mediteran – N” Sh.P.K. me pronar Nikollë Dodaj.
Më datën 29.02.2024 kishte urdhëruar këtë kompaninë që sasinë e mishit të peshkut prej 31,296 kg ta tërheq nga tregu dhe ta kthej në vendin e origjinës ose ta asgjësoj brenda afatit prej 60 ditësh.
Sasia e mishit të peshkut e kompanisë “Mediteran – N” Sh.P.K. që është konstatuar e infektuar me krimba është e këtyre llojeve: HGT Merluc 450/650 gr., HGT Merluc 200/350 gr., HGT Merluc 200/350 gr. dhe HGT Merluc 100/200 gr.
Veriu.info ka dërguar pyetje në Doganën e Kosovës për të kuptuar se këto dy lote importi me këta mish peshku në çfarë sasie ka ardhur në Kosovë në momentin e hyrjes në doganë, por që deri në momentin e publikimit të këtij artikulli nuk kemi marrë përgjigje. Kjo e dhënë është e rëndësishme, pasi që duhet të dihet se çfarë sasie e këtij mishit ë importuar është shitur nga data e hyrjes në Kosovë deri në momentin e zbulimit se është i infektuar me këtë lloj krimbi./Veriu.info
