Marketet në vendin tonë kanë qenë dhe vazhdojnë të jenë cak i vjedhjeve dhe grabitjeve, ku hajnat arrijnë të kapin para apo gjësende ushqimore. Raste të shumta kanë ndodhur në pikat e rrjetit të Viva Fresh në plot qytete. Përveç humbjeve, plaçkitjet po shkaktojnë pasiguri si për punëtorët ashtu edhe për klientët.
Një rast i tillë është raportuar mbrëmjen e së premtes, më 23 maj 2025, rreth orës 20:30.
Sinjali mëson se dy punëtore të marketit “Viva Fresh” në rrugën “Bajram Kelmendi” në Prishtinë kanë raportuar rastin që ka ndodhur brenda objektit ku punojnë.
Burime të sigurta nga Viva Fresh bëjnë me dije se A.A dhe M.I. kanë deklaruar se gjatë kohës sa ndodheshin në vendin e punës, u janë vjedhur para nga çantat personale, të cilat i kishin lënë në zhveshtore.
Sipas deklarimeve të tyre, nga kamerat e sigurisë të vendosura në objekt, shihen dy fëmijë të mitur, të moshës rreth 9 deri 12 vjeç, duke hyrë në hapësirat ku ishin sendet personale të punëtoreve dhe duke marrë shumat prej 50 dhe 35 euro.
Përshkrimi i fëmijëve të dyshuar:
– Njëri me pantallona farmerka ngjyrë kaltër ose hiri dhe fanellë të gjelbër
– Tjetri me duks të zi dhe flokë të kafta.
Lidhur me rastin është kontaktuar edhe Policia, duke iniciuar rast penal për veprën “Vjedhje”.
Hetimet janë në vazhdim, ndërsa autoritetet po punojnë për identifikimin e të miturve të përfshirë në rast./Sinjali/Veriu.info
