Ka dështuar për të 20-tën herë përpjekja për konstituimin e Kuvendit të Kosovës.
As në seancën e së premtes nuk pati kuorum për të votuar komisionin për votim të fshehtë. Vetëm 53 deputetë votuan pro, duke pamundësuar kështu vazhdimin e procesit.
Seanca e radhës është caktuar sot, me fillim nga ora 11:00.
Në 11 seancat e fundit, Kuvendi ka dështuar në të njëjtën pikë – në propozimin e kryesuesit Avni Dehari që votimi për kryetarin e Kuvendit të bëhet në mënyrë të fshehtë.
Të mërkurën, PDK-ja, LDK-ja, Lista Serbe dhe AAK-ja nuk propozuan anëtarë për komisionin për votim të fshehtë dhe nuk morën pjesë në votim, duke e bllokuar kështu sërish procesin.
Pas dështimit të 20-të me radhë, deputetja e PDK-së, Vlora Çitaku, e ka akuzuar kryeministrin në detyrë dhe liderin e Vetëvendosjes, Albin Kurti, për bllokadën që po vazhdon në Kuvend.
“103 ditë të humbura për Kosovën, 103 ditë pa i adresuar hallet e qytetarëve të Kosovës. PDK-ja vazhdon të jetë konstruktive. Ne jemi të gatshëm çdo moment që të hapim rrugë, kemi ofruar alternativat tona. Mirëpo, Kosova po mbahet peng e kryeneçësisë së Albin Kurtit. Bëjmë ftesë për reflektim që të ecim tutje”, është shprehur Çitaku.
Ndërkohë, deputetja e Vetëvendosjes, Donika Gërvalla, ka kërkuar një reagim “racional” nga deputetët e partive opozitare, duke theksuar se bllokimi i Kuvendit po ndikon në kontrollin e institucioneve.
“Kjo situatë është e papranueshme, që kërkon zgjidhje të menjëhershme por për të gjetur zgjidhje të menjëhershme kërkon reagim racional nga deputetët e opozitës që bllokojnë kuvendin dhe duke e bllokuar, bllokojnë edhe mundësinë e tyre për të shtruar kontrollin e Kuvendit mbi institucionet e pavarura të Kosovës. Bëj thirrje që kjo qasje bllokuese të ndalet sepse beteja politike bëhet për zgjedhjen e qeverisë. Nuk bëhet për një temë që është e vetëkuptueshme”, ka thënë Gërvalla.
Në anën tjetër, pak para nisjes së seancës, deputetja nga komuniteti boshnjak, Duda Balje, ka deklaruar se në këmbim të votës për Albulena Haxhiun për kryetare të Kuvendit, i është ofruar një pozitë si profesoreshë në Maqedoninë e Veriut.
Ajo është pyetur nga gazetarët për këtë çështje, dhe përgjigjja e saj ka qenë: “Nuk kanë thënë direkt, por po”.
“Pata disa thirrje nga persona që nuk janë direkt të politikës, por të shoqërisë. Para disa vitesh kam aplikuar për vendin e profesoreshës në Maqedoni sepse e kam shtetësinë dhe kam plotësuar kushtet, por ka qenë para sa vitesh dhe më nuk kam aplikuar. Tash kanë thënë se ka mundësi për të biseduar për vendin e punës nëse…”, ka thënë ajo.
Balje ka bërë të ditur se një mike e saj, që nuk është e lidhur me politikën, ka qenë ajo që ia ka përcjellë këtë ofertë, të cilën e ka refuzuar.
“Kam thënë jo, kam refuzuar sepse nuk i njoh këta persona dhe ka qenë e papranueshme mënyra si ma kanë ofruar. Dy-tri thirrje. Nuk jemi takuar, kanë qenë telefonata”, është shprehur Balje.
