Kreu i Nismës Socialdemokrate, Fatmir Limaj, ka ndarë detaje nga takimet që ka zhvilluar me kreun e Vetëvendosjes, Albin Kurti, në përpjekje për lidhjen e një koalicioni.
Limaj tha se me Kurtin janë takuar gjithsej tri herë dhe se takimi i parë mes tyre ka qenë dy ditë para seancës konstituive të 15 prillit.
Ai konfirmoi se ka kërkuar nga Kurti pozitën e Kryetarit të Kuvendit.
“z.Kurti ka ofru një opsion për qeverisje, për me qenë pjesë e Qeverisë. I kam thënë që Nisma nuk është e interesuar pjesë e Qeverisë. I kemi arsyet tona. Nëse ju doni partneritet me neve, ne mund të bëjmë partneritet në nivel Kuvendi Tani për tani s’jemi të intersuar për qeveri. Jam i gatshëm që të marrë përgjegjësinë e Kryetarit të Kuvendit dhe një paketë ligjore”, ka deklaruar Limaj.
Tutje, ai tha se në takimin e fundit kanë pas edhe dakordim gojor me Kurtin, që Limaj të bëhet Kryetar Kuvendi. Gjithë kjo tha se ka ndodhur para seancës së 15 prillit.
“Në fund të takimit të fundit, kur kemi qenë veç unë e ai, kemi pas një dakordim gojor dhe ai ka pas me shku me bisedu me partinë e vetë, unë me shku me partinë time. Ka mbetur z.Kurti të shkojë me partinë”, deklaroi Limaj në T7.
Kurti javën e kaluar ka konfirmuar se ka pasur disa takime me Limajn. Ai tha se kanë dështuar të arrijnë marrëveshje, shkaku i një parakushti të Limajt që ta kenë pozitën e Kryeparlamentarit.
Ai shprehu interesim për një koalicion me Limajn, në këmbim të ministrive.
“Unë jam shumë i interesuar që të bashkëqeverisim, pra që ata të kenë Ministri në Qeveri”, tha Kurti.
Sipas tij, një parti me tre deputetët s’mund ta ketë pozitën e Kreut të Kuvendit.
“Unë kam pasur takime me Kryetarin e Nismës Socialdemokrate. Takimet kanë kaluar në një atmosferë ku është rritur besimi, ku është rritur mirëbesimi, vullneti për të bashkëpunuar, mirëpo nuk ka pasur marrëveshje. Thjeshtë për shkak të insistimit për shkak të një parakushti për bashkëpunim në të ardhmen për pozitën e Kryeparlamentarit. Një partie me 3 deputetë t’ia japim Kryeparlamentarin, kur e kam koalicionin me një parti që e ka dyfishin e deputetëve…nuk ishte një gjë e mundur”, deklaroi Kurti në RTK.
Ai tha se është lajm që Limaj është kthyer në Kuvend, teksa shtoi se AAK’ja e kaloi pragun falë tij.
“Është lajm që Fatmir Limaj, Komandant “Çeliku” është kthyer në Kuvendin e Republikës, që Nisma Socialdemokrate, që do të duhej të jetë parti simotër me VV’në i ka 3 deputetët në Kuvendin. Le të mos harrojmë, jo vetëm që u kthye Fatmir Limaj në Kuvendin e Republikës, por njëkohësisht ia mundësoi AAK’së ta kalojë pragun. Pa Nismën, AAK’ja kësaj radhe do të ngelej nën prag”, deklaroi Kurti.
