Policia e Kosovës është duke kryer bastisje në Ministrinë e Bujqësisë, kështu ka konfirmuar Prokuroria Speciale e Kosovës.
Bastisjet, sipas Prokurorisë Speciale, po kryhen në katër lokacione.
Prokurori Admir Shala ka deklaruar se tashmë ka filluar një hetim lidhur me dyshimet mbi dhënien në shfrytëzim të fabrikës së mbetjeve shtazore.
“Prokuroria Speciale e ka filluar një hetim lidhur me dhënien ne shfrytëzim të fabrikës të përpunimit e nënprodukteve shtazore. Hetimi është duke u zhvilluar lidhur me dyshimet për dhënien me qera të kësaj fabrike. Jemi në fazën e hetimit. Jemi duke i zhvilluar bastisjet dhe kontrollet në bazë të urdhrit të gjykatësit në Themelore në Prishtinë me kërkesë të Prokurorisë Speciale”, ka deklaruar ai para mediave.
Shala ka theksuar se nuk mund të japin më shumë detaje pasi janë në fazën e grumbullimit të informacioneve.
“Po ashtu, me autorizimin tonë së bashku me në është duke i ndërmarrë të gjitha intervenimet e nevojshme, me qëllim të sigurimit të informacioneve të nevojshme drejt zbardhjes së rastit konkret. Për më detaje nuk mund të lëshohemi tani për shkak që jeni në fazën e hetimit, të grumbullimit të informacioneve”, ka deklaruar tutje Shala.
Ai ka treguar se hetuesit janë duke e bastisur Ministrinë e Bujqësisë, Agjencinë për Zhvillimit të Bujqësisë, Agjencinë e Veterinarisë dhe kompaninë që e ka fituar tenderin ‘Funksionalizimi i objekteve për përpunimin e produkteve shtazore’.
