Lëvizja Vetëvendosje ka bërë të ditur se Valon Prebreza do të jetë kandidat për kryetar të Komunës së Fushë Kosovës për zgjedhjet lokale, që pritet të mbahen këtë vit.
Në njoftimin e LVV’së në ‘Facebook’, qeverisja aktuale e Burim Berishës vlerësohet si “katrahurë” dhe “katastrofale”, teksa s’lihet pa u dhënë edhe zotimet e para.
“Katrahurës së madhe të shkaktuar nga keqqeverisja e deritanishme lokale në Fushë Kosovë do t’i përgjigjemi me alternativën më të mirë qeverisëse për këtë komunë. Valon Prebreza dhe Lëvizja VETËVENDOSJE! janë zgjidhja për përmirësimin e jetesës për qytetarët në Fushë Kosovë.
Frymën e investimeve të Qeverisë Qendrore, të cilat kanë zgjidhur probleme dhjetëra vjeçare për lagjet e fshatrat e Fushë Kosovës, siç është rrjeti i ujësjellësit në disa fshatra dhe projekte të tjera, do ta vazhdojmë edhe në nivelin lokal“, thuhet ndër të tjera në njoftim.
Valon Prebreza është udhëheqës i Njësisë për Politikat dhe Monitorimin e Ndërmarrjeve Publike.
Prebreza kishte akuzuar për keqmenaxhim tek shoqëria aksionare e Trepçës. Ai në një komision gjatë kohës sa grevohej nga minatorët e Trepçës akuzonte këta të fundit se po takohen jo-zyrtarisht me opozitën.
“Nuk më takon mua me hy në debat politik mirëpo do të thuhet e vërteta. Z. Lekaj e tha një të pavërtetë të madhe, që ministrja ndodhet në Kosovë. Nuk është në Kosovë, është jashtë, në udhëtim zyrtar kështu që ju garantoj për këtë pjesë. Ndërsa, në takimet me sindikatën unë kam qenë i autorizuar me u taku me sindikatën”, deklaronte ai.
“Mos ndërhyj se nuk të ndërhyva… Zotni, duhet të thuhet e vërteta, prandaj po ju dhemb. Ka keqpërdorim, ka keqmeanxhim që 20 vite tek Trepça. Pikërisht politika duhet mu hjekë prej sindikatës dhe Trepçës, prandaj këtë po ua kërkoj. S’është ka ju tutet kërkush. Z. Kryetar, e vërteta po ju dhemb. Po më duket edhe u binda se ju keni takime jashtë zyrtare me njerëz që janë tu i majtë në minierë aty. Po jo bre se s’dal jashtë”, deklaronte Prebreza, i cili ishte përjashtuar nga ky komision.
Prebreza u bë i famshëm për mos-publikim të CV-së së tij gjatë kohës së emërimit. Përkundër insistimit të mediave që, përmes kërkesës në qasje të dokumenteve publike të kihet qasje në CV-në e Prebrezës, Ministria e Ekonomisë vendosi ta fshehë atë.
Për këtë çështje patën reaguar edhe nga Instituti GAP. Drejtori ekzekutiv i institutit e pati cilësuar si “punësim politik” angazhimin e Prebrezes si shef njësie për mbikëqyrjen e ndërmarrjeve publike.
“Ndonëse në programin elektoral të vitit 2021 VV e trajtojnte drejtë problemin tek ndërmarrjet publike: “Qeveria jonë do të kujdeset që menjëherë të vazhdojmë me procesin e departizimit dhe normalizimit të punës në ndërmarrjet publike aq të goditura si nga pandemia ashtu edhe nga keqmenaxhimi, partizimi e zhvatja e dy dekadave të fundit.” Tani, në 2023, në mundësinë e parë për të emëruar ndonjë profesionist/e në pozitën më kyçe në raport me ndërmarrjet publike, atë të udhëheqësit/es së Njësisë për ndërmarrjet publike (NjPMNP-së), qeveria dhe ministrja Rizvanolli zgjedhin ta emërojnë aty një aktivist/anëtar të VV-së. Një person që nuk ka as CV publike, e lërë më të njihet në publik si ekspert i kësaj fushe!”, pati shkruar ai në ‘Facebook’.
